दिपावलीच्या सणावेळीच घडला रक्तरंजित प्रकार

पोलिसांनी दिलेल्या माहितीनुसार, 21 ऑक्टोबरच्या रात्री लक्ष्मीपूजनानंतर मध्यरात्री सव्वादोन वाजण्याच्या सुमारास गल्ली क्रमांक 13 मध्ये सुनील पाथरवट आपल्या मित्रांसह गप्पा मारून घरी जात होते. यावेळी शेखर पाथरवट, सागर कलगुटगी, रोहीत राडू पाथरवट, विजय उर्फ पिंटू पाथरवट, संजय आणि शिवानंद पाथरवट या सहा जणांनी पूर्ववैमनस्यामुळे राग डोक्यात ठेवून त्याच्यावर हल्ला केला. हल्ल्यात आरोपींनी चाकूने सलग वार केले. गंभीर जखमी स्थितीत सुनिलला सांगली सिव्हील रुग्णालयात नेण्यात आले. मात्र उपचारापूर्वीच डॉक्टरांनी त्याला मृत घोषित केले.

प्रत्यक्षदर्शीने उजेडात आणला संपूर्ण प्रकार..
याबाबत माहिती मिळताच जयसिंगपूर पोलिसांनी घटनास्थळी तात्काळ धाव घेत पंचनामा केला असून आसपासच्या सीसीटीव्ही फुटेजचा तपास सुरु आहे. मृत सुनिलचा मित्र विशाल शिवाजी पवार याने पोलीस ठाण्यात दिलेल्या फिर्यादीनुसार, दोन महिन्यांपूर्वी आरोपी आणि सुनिल यांच्यात वाद झाला होता. या वादातूनच “आज याला जिवंत सोडायचं नाही” अशी धमकी देत आरोपींनी सुनीलवर हल्ला केल्याचे पवारने सांगितले. याप्रकरणी सहा जणांविरुद्ध गुन्हा नोंदवण्यात आला. संशयित सहा जणांपैकी चौघांना पोलिसांनी ताब्यात घेतले असून अन्य दोघांचा शोध पोलीस घेत आहेत.

तपासासाठी नेमले पथक..
शिरोळ विभागाचे पोलीस निरीक्षक सत्यवान हाके यांच्या मार्गदर्शनाखाली स्वतंत्र तपास पथक तयार करण्यात आले आहे. संशयितांचा शोध घेण्यासाठी जयसिंगपूर शहरासह आजूबाजूच्या भागात शोधमोहीम सुरु आहे. पूर्व वैमान्यातूनच ही घटना घडली असून ताब्यात घेतलेल्या संशयतांना 28 ऑक्टोबर पर्यंत पोलीस कोठडी सुनावण्यात आली आहे, असे पोलीस निरीक्षक सत्यवान हाके यांनी सांगितले.