राज्य क्रीडा क्षेत्रात निर्णायक मानली जाणारी ही निवडणूक 2 नोव्हेंबरला पार पडणार आहे. तीन क्रीडा संघटनांचे प्रत्येकी दोन प्रतिनिधी अशा एकूण 60 मतदारांपुढे ‘अजितदादा की मुरलीअण्णा’ असा प्रश्न उपस्थित झाला आहे. दोघेही राजकारणात प्रभावी असल्याने ही निवडणूक आता क्रीडा संघटनेपलीकडे जाऊन राजकीय प्रतिष्ठेची झाली आहे.

अजित पवार यांनी कबड्डी संघटनेतून, तर मुरलीधर मोहोळ यांनी कुस्ती महासंघाच्या माध्यमातून अर्ज सादर केला आहे. अजित पवार हे यापूर्वी तीन कार्यकाळ संघटनेचे अध्यक्ष राहिले असून, सलग चौथ्या वेळेस पद टिकवण्यासाठी मैदानात उतरले आहेत. दुसरीकडे, मोहोळ हे प्रथमच या निवडणुकीत जोरदार तयारीसह उतरत आहेत.
Ajit Pawar : ‘दादा, डिव्हायडर मोठे करा, कुत्री उड्या मारतात’; तक्रार ऐकून अजितदादा डोक्यावर हात मारत म्हणाले…
या निवडणुकीत अजितदादा उभे आहेत त्यांची मंडळी उभी आहेत शेवटी राज्यात आम्ही महायुती म्हणून एक आहोत ही परिस्थिती वेगळी आहे. खेळ हा विषय वेगळा आहे. त्यामुळे खेळीमेळीच्या वातावरणात निवडणूक होईल असं वाटतंय, अशी प्रतिक्रिया मुरलीधर मोहोळ यांनी या निवडणुकीवर दिली आहे.

तर दुसरीकडे, भाजप नेते रामदास तडस यांनी थेट अजित पवारांना लक्ष करत, ‘क्रीडा संघटनांवर माजी खेळाडूंनाच नेतृत्व करू द्या, राजकारण तिथे ओढू नका. अजित पवार यांच्या अध्यक्षतेत गेल्या काही वर्षांत क्रीडा क्षेत्राचे नुकसान झाले असून त्यांच्या समितीने आर्थिक हिशोबही स्पष्ट केलेला नाही.’ असा गंभीर आरोप केलेला आहे. त्यामुळे ही निवडणूक रंगतदार होणार यात शंका नाही.

दरम्यान, आदिल सुमारीवाला, दयानंद कुमार, प्रदीप गंधे आणि प्रशांत देशपांडे हे उपाध्यक्ष म्हणून बिनविरोध निवडले जाणार आहेत. तर सरचिटणीसपदासाठी नामदेव शिरगावकर आणि संजय शेट्ये यांच्यात लढत होईल. राज्याच्या क्रीडा विश्वासह राजकीय वर्तुळाचे लक्ष आता या निवडणुकीकडे लागले असून, 2 नोव्हेंबर रोजी कोण बाजी मारणार याची उत्सुकता चांगलीच वाढली आहे.