ज्याप्रकारचा गोंधळ सुरु आहे मतदान याद्यांमध्ये आताचा नाही, गेल्या काही वर्षांचा आहे. २०१६-१७ ला मी याविरोधात आवाज उठवला होता. व्होटिंग मशीन, मतदार याद्यांबाबत आवाज उठवला होता. ज्यावेळी प्रत्येकाच्या दारावर टकटक व्हायला लागली, तेव्हा कळालं की काय प्रकार सुरु आहेत निवडणुकीचे. आता विधानसभेत २३२ आमदार निवडणून आले, तरी महाराष्ट्रात सन्नाटा होता. मतदार तर आवाक् झालेच होते, पण निवडून आलेलेही आवाक् झाले होते, असा टोला राज ठाकरेंनी लगावला.

सगळ्यांनाच कळालं की, कशा निवडणुका चालल्या आहेत या देशात. अनेकजण म्हणतात राज ठाकरेंच्या सभांना गर्दी होते, पण मतं येत नाहीत. असं सरु राहिल तर कसं येईल मतामध्ये. राज्यातील स्थानिक पक्षांना संपवण्याचं काम सुरु आहे. अशा मतदारयादा तयार करायच्या, माणसं घुसवायची, असं राज ठाकरे म्हणाले.

मला तर कळालं आहे, आगामी निवडणुकांपूर्वी जवळपास 96 लाख खोटे मतदार महाराष्ट्राच्या यादीत भरले आहेत. अशा निवडणुका होणार आपल्या देशात, कशाला निवडणूक लढायच्या, पैसे खर्च करायचे, कशाला मतदारांनी मतदान करायचं, हा मतदारांचा अपमान आहे. तुम्ही मतं द्या नाहीतर नका देऊ मॅच फिक्स आहे, अशा निवडणुका होणार. हे कोणत्या प्रकारचं षडयंत्र आहे, कोणत्या प्रकारची लोकशाही आहे. मग म्हणायचं यांचा एकही आमदार निवडून आला नाही. अरे येणार कसा, जर मतदार याद्यांमध्ये गणित सेट असतील तर निकाल आधीच ठरलेला आहे, असा गंभीर आरोप राज ठाकरेंनी केला आहे.

निवडणूक आयोगाला या याद्या सुधारा म्हणतोय, मला कळत नाही, सत्ताधारी पक्षाचे लोक का चिडत आहेत. लागतंय ना कुठेतरी. आम्ही निवडणूक आयोगाला प्रश्न विचारले की सत्ताधारी उत्तर देतात. तुम्हाला कोणी विचारलं. तुम्हाला राग येतोय कारण तुम्ही शेण खाऊन ठेवलं आहे. सगळ्यांना माहितीये की ही सत्ता कशी आली. कशाप्रकारचं राजकारण सुरु आहे. हीच माणसं जेव्हा विरोधात होते, तेव्हा तेच बोलायचे जे मी आता बोलतोय, असं म्हणत राज ठाकरेंनी सत्ताधाऱ्यांना सुनावलं.