महाराष्ट्र ऑलिम्पिक संघटनेच्या अध्यक्षपदासाठी होणाऱ्या निवडणुकीत उपमुख्यमंत्री अजित पवार आणि केंद्रीय मंत्री तसेच पुण्याचे खासदार मुरलीधर मोहोळ हे दोघे एकमेकांविरुद्ध रिंगणात उतरले आहेत. २ नोव्हेंबरला होणाऱ्या या निवडणुकीपूर्वीच राजकीय वातावरण तापले असून भाजपकडून अजित पवार यांना थेट माघार घेण्याची मागणी करण्यात आली आहे.

भाजप नेते आणि महाराष्ट्र कुस्तीगीर संघाचे अध्यक्ष रामदास तडस यांनी यावर बोलताना करताना म्हटले आहे की, ‘क्रीडा संघटनांवर माजी खेळाडूंनाच नेतृत्व करू द्या, राजकारण तिथे ओढू नका. अजित पवार यांच्या अध्यक्षतेत गेल्या काही वर्षांत क्रीडा क्षेत्राचे नुकसान झाले असून त्यांच्या समितीने आर्थिक हिशोबही स्पष्ट केलेला नाही,’ असा गंभीर आरोप तडस केला आहे. तर, अजितदादांनी निवडणुकीतून माघार घेतली, तर मुरलीधर मोहोळ यांच्यासारख्या माजी खेळाडूंच्या नेतृत्वाखाली महाराष्ट्रातील क्रीडा क्षेत्र अधिक सक्षम आणि पारदर्शक होईल. असं देखील रामदास तडस म्हणाले आहेत.

दरम्यान, या निवडणुकीमुळे राज्यात पुन्हा एकदा खेळात राजकारणचा खेळ पहायला मिळणार आहे. परिणामी, आता महाराष्ट्र ऑलिम्पिक संघटनेची निवडणूक बिनविरोध होण्याची शक्यता पूर्णपणे धुसर झाली आहे. त्यामुळे ही निवडणूक जरी महाराष्ट्र ऑलिम्पिक संघटनेच्या अध्यक्षपदासाठी होत असली तरी अजित पवार आणि मुरलीधर मोहोळ यांच्या होत असलेल्या लढाईमुळे दोन्ही पक्षांसाठी प्रतिष्ठेची बनली आहे.