रविवारी पहाटे कोल्हापुरातील शिरोळ तालुक्यातील श्रीक्षेत्र नृसिंहवाडी येथे कृष्णा नदीत आंघोळीसाठी उतरताना अपघात घडून बीड जिल्ह्यातील अशोक रामकिसन सौदागर (वय 38, मूळ रा. अहिल्यानगर, उमरी रोड, केज, सध्या रा. नृसिंहवाडी) यांचा बुडून मृत्यू झाला. या घटनेमुळे परिसरात शोककळा पसरली आहे.

अशोक सौदागर हे मूळचे बीड जिल्ह्यातील केज येथील असून, काही काळापासून देवदर्शनासाठी विठ्ठल-बिरदेव यात्रेमुळे पट्टणकोडोली आणि नंतर नृसिंहवाडी येथे आले होते. रविवारी सकाळच्या सुमारास मित्रांसमवेत कृष्णा नदीच्या पात्रात स्नानासाठी उतरले असता, पाण्याचा अंदाज न आल्याने आणि पाय घसरल्यामुळे ते अचानक खोल पाण्यात गेले. काही क्षणातच ते पाण्यात बुडाले. उपस्थित मित्रांनी आरडाओरड केली आणि मदतीसाठीही आवाज दिला.

Beed Crime : ‘अनेक वेळा सांगून या ठिकाणी का राहता?’; घरात घुसून डोक्यावर, पाठीत अन् पायांवर वार, सतीश भोसलेच्या कुटुंबावर जीवघेणा हल्ला

या घटनेची माहिती मिळताच आपत्ती व्यवस्थापनातील वजीर रेस्क्यू फोर्सच्या सदस्यांनी तत्काळ घटनास्थळी दाखल होऊन शोधमोहीम सुरू केली. रेस्क्यू फोर्समधील रौफ पटेल, शिवराज सोनार, दशरथ शिकलगार, मज्जित कळगी, कल्लाप्पा घेरडे या सदस्यांनी मिळून प्रयत्नपूर्वक मृतदेह बाहेर काढला. नंतर मृतदेह शिरोळ येथील ग्रामीण रुग्णालयात नेण्यात आला. वैद्यकीय तपासणीनंतर तो नातेवाईकांच्या ताब्यात देण्यात आला.

अशोक सौदागर हे बीडमधील केज शहरात गॅस वितरणाचे काम करत होते. त्यांच्या मृत्यूमुळे कुटुंबावर दुःखाचा डोंगर कोसळला आहे. त्यांच्या पश्चात आई-वडील, पत्नी व दोन मुले असा परिवार आहे. श्रीक्षेत्र नृसिंहवाडी येथे दरवर्षी यात्रेच्या काळात हजारो भाविक गर्दी करतात. मात्र, नदीतील पाण्याचा अंदाज न घेता उतरणाऱ्या भाविकांना अशा प्रकारच्या दुर्दैवी घटनांना सामोरे जावे लागत आहे. प्रशासनाने भाविकांना सावधगिरी बाळगण्याचे आणि नदी पात्रात सतर्क राहण्याचे आवाहन केले आहे.

दरम्यान, कृष्णा नदीच्या किनार्‍यावर आणि दत्त मंदिर परिसरात भाविकांची नेहमीच वर्दळ असते. पायऱ्यांवरून पाय घसरून मृत्यू झाल्याची यंदा ही दुसरी मोठी घटना घडली आहे. मात्र भाविकांनी देखील सुरक्षिततेचे नियम काटेकोरपणे पाळणे गरजेचे असल्याची बाब पुन्हा एकदा अधोरेखित झाले आहे.

लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा