यावेळी मनसे नेते अविनाश जाधव यांनी सत्ताधारी पक्षातील नेत्यांवर जोरदार टीका केली. ठाणे महानगरपालिका निवडणुकांचं रणशिंग फुंकत लवकरच वाहतूक कोंडीविरुद्ध मोर्चा काढू असं अविनाश जाधव म्हणाले. आम्ही दोन पक्ष असलो तरी या पत्रकार परिषदेत आम्ही, जितेंद्र आव्हाड आणि विक्रांत चव्हाणही दिसतील. आम्ही बाळासाहेबांची ओरिजनल फौज आहोत, आता पैसा टिकणार नाही, असं म्हणत अविनाश जाधवांनी शिंदेंच्या शिवसेनेला थेट इशाराच दिला आहे. दरम्यान, जितेंद्र आव्हाड व विक्रांत चव्हाणांचा उल्लेख केल्यावरुन मनसे आगामी निवडणुकांसाठी महाविकास आघाडीचा भाग असणार का? असाही प्रश्न उपस्थित होतो आहे.
‘बदला घेतल्याशिवाय राहणार नाही’; मारहाणीनंतर भैया गायकवाड अ‍ॅक्शन मोडमध्ये, म्हणाला, ‘जेवढं मारलंय ना…’

ठाण्यामध्ये दहशतीचे वातावरण आहे. त्यामुळे अनेकजण तिकडे आहेत. आम्ही एकत्रीत लढू, आम्ही घाबरणार नाही, ठाणेकरांसाठी आम्ही लढणार, असे म्हणत अविनाश जाधवांनी मनपा निवडणुकीत शिवसेना-मनसे युतीचे स्पष्ट संकेत दिले आहेत.

पाणीविक्री, वाहतूक कोंडी, मोर्चे यांचा पाढा वाचत पालिकेला यांनी लुटून खाल्लं असंही यावेळी अविनाश जाधव म्हणाले आहेत. चार हजार कोटींच्या महानगरपालिकेला या लोकांनी बरबाद केलं, या लोकांनी पालिका लुटून खाल्ली. जेव्हा आमची सत्ता येईल, तेव्हा सर्वांची चौकशी लाऊन यांना आत टाकू असा हल्लाबोल जाधवांनी केला आहे.

विचारेंनी महापालिकेतला भ्रष्टाचार काढला

यावेळी ठाकरेंच्या शिवसेनेचे माजी आमदार राजन विचारे यांनी त्यांची भूमिका स्पष्ट केली. त्यांनी यावेळी सत्ताधारी शिंदेच्या सेनेवर आगपाखड केली. ठाणे महापालिकेत 2017 पासून 2025 पर्यंत एकही निवडणूक घेतली नाही. निवडणूक घ्यायला का घाबरता? पालिकेकडे ३०-३५ कोटीही नाहीत अशी अवस्था पालिकेची झाली आहे. पालिकेनंतर शासनाचे पैसेही आणले पण त्याची कुठे नोंद नाही सर्व कामे कागदावर आहेत. वर्धापनाच्या दिवशी खुशखबर दिली, अधिकाऱ्याला रंगेहात पकडले असे म्हणत राजन विचारेंनी ठाणे महापालिकेचा भ्रष्टाचार यावेळी समोर आणला.

ठाण्यात मोर्चा

‘आम्ही सोमवारी धडक मोर्चा आणत आहोत, सर्वानी या मोर्चात सामील व्हावं, प्रशासनाला जाब विचारण्यासाठी जात आहोत, रस्त्यावर उतरून यशस्वी आंदोलन करणार’, असा इशारा यावेळी विचारे यांनी दिला.