निलेश घायवळ प्रकरणी मी स्वतः पुणे पोलीस आयुक्त अमितेश कुमार यांच्याशी बोललो असल्याचं अजित पवार म्हणाले आहेत. निलेश घायवळ प्रकरणात मी स्वतः पोलीस आयुक्तांना सांगितलं आहे की, कुणीही असो कुठल्याही पक्षाचा असो जर त्याने कायदा हातात घेण्याचा प्रयत्न केला, नियमांचे उल्लंघन करत असेल तर त्याच्यावर कारवाई करा. सचिन घायवळ याच्या बंदुकीच्या परवान्यासाठी गृहराज्यमंत्री योगेश कदम यांनी शिफारस केली होती. मात्र, तरीही त्यांना परवाना दिलेला नसल्याचे पोलीस आयुक्त अमितेश कुमार यांनी आपल्याला सांगितल्याचं अजित पवार म्हणाले आहेत. पुणे असो किंवा इतर कुठेही असो कायदा सुव्यवस्था राखण्याची जबाबदारी पोलिसांची असते आणि मी त्यात कुणाचाही हस्तक्षेप खपवून घेणार नाही, असं देखील अजित पवारांनी सांगितलं आहे.
लाडकी बहीण योजनेचे पैसे हवे असतील तर ‘ही’ गोष्ट करावीच लागणार; मुदतीवर अजित पवारांचं महत्त्वाचं वक्तव्य
पंतप्रधान नरेंद्र मोदी यांच्या कार्यक्रमाच्या निमित्ताने मुख्यमंत्री देवेंद्र फडणवीस उपमुख्यमंत्री एकनाथ शिंदे आणि मी असे मी तिघेही एकत्र होतो. त्यावेळीही निलेश घायवळ याचा विषय निघाला होता. त्यावेळी मुख्यमंत्र्यांनी देखील याबाबतीत कुणाचंही ऐकायचं नाही हीच भूमिका घेतली. ज्यांनी चुका केल्या असतील त्याच्यावर रीतसर कारवाई करावी अशीच भूमिका मुख्यमंत्री देवेंद्र फडणवीस यांनीही घेतली. त्यामुळे जे कायदा हातात घेतील त्यांच्यावर कारवाई होईलच, असंही अजित पवार यांनी म्हटलं आहे.