मिळालेल्या माहितीनुसार, रमेश मुळे यांच्या फॉर्च्युनर कारचा विमा (इन्शुरन्स) संपला होता. तो काढण्यासाठी रमेश मुळे हे गेले असता, रमेश मुळे यांच्या नावावर असलेली कार ही त्यांच्या नावावर नसल्याची माहिती समोर आली आणि त्यांच्या पायाखालची जमीनच सरकली. रमेश मुळे यांनी कारच्या व्यवहाराची माहिती काढली असता त्यांचा पुतण्या संजय उर्फ सुन्जोय मुळे याने दोन बनावट आधारकार्ड आणि दोन पॅनकार्ड तयार केल्याची माहिती समोर आली. तसंच खोटं गॅजेट दाखल करून नाव बदलाचा बनावट पुरावा तयार केला आणि जुन्या नावाचा वापर करून वाहने खरेदी-विक्री केली. नाशिक महानगरपालिकेकडेही जुन्याच नावाने व्यवहार केल्याची माहिती समोर आली आहे.

या प्रकरणात रमेश अर्जुनराव मुळे (वय ५८, रा. तोरणागडनगर, मुकुंदवाडी ) यांनी तक्रार दिली असून ते समाजसेवक आहेत. मुळे यांनी 16 सप्टेंबर 2014 रोजी पुणे येथून नवीन फॉर्च्युनर घेतली. तिची नोंदणी पिंपरी-चिंचवड येथील आरटीओमध्ये झाली होती. गाडीवर 22 लाख 50 हजारांचे कर्ज घेतले होते. कर्जाचे सर्व हप्ते रमेश मुळे यांनी वेळोवेळी भरले असून 17 नोव्हेंबर 2021 रोजी त्यांनी उरलेले 9 लाख भरून कर्ज पूर्ण फेडलं आहे. परंतु, कर्ज पूर्ण भरल्यानंतर बँकेकडून एनओसी आणि मूळ आरसी बुक त्यांनी घेतले नव्हते. ही प्रक्रिया पूर्ण करण्यासाठी रमेश मुळे यांनी पुतण्या संजय मुळे याला पॅनकार्ड व आधारकार्ड काही काळासाठी दिले होते. याच दस्तऐवजांचा वापर करून सुन्जोय उर्फ संजय मुळे याने काकांचा घात केला आणि बनावट स्वाक्षऱ्या केल्या. बँकेतील संबंधित अधिकाऱ्यांशी संगनमत करून आरसी बुक आणि एनओसी त्याने स्वतःकडे घेतली. तसंच या कागदपत्रांच्या आधारे 22 लाखांची कारही स्वत:च्या नावावर करून घेतली.

दरम्यान, या प्रकरणी संजय उर्फ सुन्जोय मुळे याच्याविरोधात मुकुंदवाडी पोलिस ठाण्यात गुन्हा दाखल करण्यात आला आहे.