‘आईच्या पोटातून जिगर घेऊन आलोय. पदासाठी कोणाच्या दारात जाणार नाही. कार्यकर्ताच माझा पक्ष आहे. माझा पक्ष, गट नक्की नाही. पण कार्यकर्त्यांसाठी येणाऱ्या स्थानिक स्वराज्य संस्थांच्या निवडणुका ताकदीनं लढणार,’ असं माजी खासदार संजय काका पाटील यांनी कार्यकर्ता मेळाव्यात सांगितलं. नगरपालिका, जिल्हा परिषद आणि पंचायत समिती निवडणुकांच्या पार्श्वभूमीवर संजय काका पाटील यांनी तासगावात कार्यकर्त्यांचा मेळावा घेतला. ‘कोणत्याही पक्षाचे उपकार नकोत. कोणतंही पद नसलं तरी संजयकाका बोलतोय हे पुरेसं आहे. संजयकाका इतकं सांगितलं तरी अधिकारी काम टाळत नाहीत,’ असं संजय काका पाटील यांनी कार्यकर्त्यांना सांगितलं.
जिथे शिंदेंनी फडणवीसांना ताकद दाखवली; तिथे आता ठाकरेंमुळे लढाई सोपी; ‘राणे पॅटर्न’ची पुनरावृत्ती
कार्यकर्ता हाच पक्ष असं संजय काका पाटील कार्यकर्त्यांना संबोधित करताना म्हणाले. विधानसभा निवडणुकीत झालेल्या पराभवानंतर संजय काका पाटील सक्रिय झाले आहेत. त्यामुळे जिल्ह्यातील राजकारणाला वेगळं वळण मिळण्याची शक्यता आहे. येणाऱ्या जिल्हा परिषद, नगरपालिका, नगरपरिषद, महापालिका निवडणुकीत विकास महाआघाडीतर्फ लढणार असल्याचं संजय काका पाटील यांनी सांगितलं. जिल्ह्यातील अनेक नेते संपर्कात असल्याचा दावा त्यांनी केला. येत्या ८ दिवसांत भूमिका स्पष्ट करणार असल्याचं ते म्हणाले.

संजय काका पाटील यांनी राष्ट्रवादी काँग्रेस-भाजप-राष्ट्रवादी काँग्रेस असा प्रवास केला आहे. राष्ट्रवादीनं त्यांना विधान परिषदेवर संधी दिली होती. २०१४ मध्ये असलेली मोदी लाट ओळखून संजय काका पाटील यांनी भाजपची वाट धरली आणि कमळ हाती घेतलं. त्यांनी काँग्रेसच्या प्रतीक पाटील यांचा तब्बल २ लाख ३९ हजार मतांनी पराभव केला. सांगलीत पहिल्यांदाच लोकसभेला भाजपचा उमेदवार विजयी झाला. सांगली लोकसभा मतदारसंघात भाजपचा विजयाचा दुष्काळ त्यांनी संपवला. १९६२ ते २०१४ अशी तब्बल ५२ वर्षे सांगली मतदारसंघ काँग्रेसकडे राहिला.
मोदींचा कानमंत्र, फडणवीस कामाला लागले, महाविकास आघाडीची चिंता वाढवणारी बातमी
२०१९ मध्ये संजय काका पाटील यांनी स्वाभिमानी शेतकरी संघटनेच्या तिकिटावर लढणाऱ्या विशाल पाटलांचा पराभव केला. त्यामुळे भाजपनं सांगलीची जागा राखली. २०२४ मध्ये भाजपनं संजय काका पाटलांना सलग तिसऱ्यांदा लोकसभेचं तिकीट दिलं. या निवडणुकीत अपक्ष लढलेल्या विशाल पाटील यांनी लाखभर मतांनी संजय काकांचा पराभव केला.

२०२४ मध्ये लोकसभेला पराभव झाल्यावर संजय काका पाटील यांनी विधानसभा लढवण्यासाठी अजित पवारांच्या राष्ट्रवादीत प्रवेश केला. पण शरद पवारांच्या राष्ट्रवादीचे उमेदवार रोहित पाटील यांनी त्यांचा २७ हजार मतांनी पराभव केला. सहा महिन्यात दोनदा संजय काका पाटील पराभूत झाले.