Pune Crime: पुणे पोलिसांनी गुन्हेगारी टोळ्यांवर कारवाईस सुरुवात केली असून टिपू पठाण टोळीने बनावट कागदपत्रांच्या आधारे हडपसरमध्ये मालमत्ता हडपल्याप्रकरणी त्यांची बँक खाती गोठवण्यात आली आहेत. तसंच अनधिकृत बांधकामे पाडण्याची कारवाई सुरू आहे.
हडपसर परिसरात बनावट दस्तऐवजांच्या आधारे मालमत्तेवर बेकायदेशीर कब्जा घेऊन नागरिकांना लाखो रुपयांना गंडा घालणाऱ्या टोळीवर काळेपडळ पोलिसांनी मंगळवारी मोठी कारवाई केली आहे. या कारवाईदरम्यान प्रमुख संशयित रिझवान उर्फ टिपू सत्तार पठाण आणि त्याच्या साथीदारांच्या बँक खात्यांवर बंदी घालण्यात आली असून, संबंधित अनधिकृत बांधकामे पाडण्याची प्रक्रिया सुरू करण्यात आली आहे.
या गुन्ह्याची नोंद काळेपडळ पोलिस ठाण्यात झाली असून, हडपसरमधील आरोपी टिपू पठाण याची एक मोटार पोलिसांनी ताब्यात घेतली आहे. त्याच्यासह सादिक कपूर, एजाज पठाण, मेहबूब शेख, जावेद शेख आणि मुनीर शेख या साथीदारांचीही बँक खाती गोठवण्यात आली आहेत. त्यांच्या बँक खात्यांमधील संशयास्पद व्यवहारांची चौकशी गुन्हे शाखेकडून सुरू आहे. तपासादरम्यान पोलिसांनी आरोपींच्या राहत्या घरांवर झडती घेतली असता, त्याठिकाणी एसी, टीव्ही, फ्रिज, फर्निचर, वॉशिंग मशिन आदी चार ते पाच लाख रुपयांच्या वस्तू आढळल्या. त्यांची खरेदी-विक्रीची बिले सादर करण्यास कुटुंबीय असमर्थ ठरले. तसेच दोन नोटरीकृत साठेखतही मिळाले असून, त्यांच्या सत्यतेचा तपास सुरू आहे. यावेळी पोलिसांकडून टिपू पठाण याच्या नावावर असलेली लाखो रुपये किंमतीची इनोव्हा चारचाकी कार जप्त करण्यात आलेली आहे. सदर कार ही 30 एप्रिल पासून टोयाटोच्या वाघोली येथील शोरूममध्ये सर्विसिंगसाठी लावलेली होती. सदर कारही जप्त करण्यात आली आहे.
भाजप ‘शरद पवार पॅटर्न’ वापरण्याच्या तयारीत; मोदींच्या होमग्राऊंडवर दिवाळीच्या आधी मोठा धमाका?
या टोळीने हडपसर भागातील 11 गुंठे जागेची बनावट कागदपत्रे तयार करून ती मालमत्ता बळकावली. जागेवरील कंपाऊंड तोडून त्यांनी बेकायदेशीर बांधकाम केले आणि ती जागा इतरांना वापरासाठी देऊन आर्थिक लाभ मिळवला. सध्या महापालिकेच्या पथकाकडून या बांधकामांवर पाडकामाची प्रक्रिया सुरू आहे. या संपूर्ण कारवाईचे नेतृत्व पोलिस उपायुक्त डॉ. राजकुमार शिंदे यांच्या मार्गदर्शनाखाली सहाय्यक पोलिस आयुक्त धन्यकुमार गोडसे, वरिष्ठ निरीक्षक मानसिंग पाटील आणि पोलिस निरीक्षक अमर काळंगे यांच्या पथकाने केले.
या प्रकरणी उपायुक्त डॉ. शिंदे यांनी सांगितले की, “बनावट दस्तऐवजांच्या आधारे नागरिकांची फसवणूक करणाऱ्यांवर कुठलाही सौम्यपणा दाखवला जाणार नाही. अशा सर्व गुन्हेगारांविरुद्ध कठोर कारवाई केली जाईल.” हडपसर परिसरात झालेल्या या फसवणूक प्रकरणामुळे नागरिकांमध्ये धास्तीचे वातावरण होते. त्यामुळे पोलिसांच्या कारवाईचे कौतुक व्यक्त केले जात आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा