या संदर्भात बाणेर पोलीस ठाण्यात गुन्हा क्रमांक 216/2025 भादंवि कलम 305 अंतर्गत गुन्हा दाखल करण्यात आला होता. फिर्यादी यांच्या अनुपस्थितीत घराचा दरवाजा उघडा असल्याची संधी साधून अज्ञात चोरट्याने घरात प्रवेश केला होता. त्याने घरातून पाच मोबाईल फोन, एक लॅपटॉप, पाच एटीएम कार्डे आणि 3000 रुपये रोख रक्कम असा एकूण 73,000 रुपयांचा ऐवज चोरून नेला होता.
Kolhapur News: महादेवाच्या दर्शनाहून परतताना कार 400 फूट खोल दरीत कोसळली, रात्रभर जोडप्याच्या मदतीसाठी हाका, सकाळी…
तपासादरम्यान, पोलिसांना मिळालेल्या गोपनीय माहितीनुसार आरोपी सुरुवातीला कोलकातामध्ये लपल्याचे समजले. त्यानुसार, सहायक पोलीस निरीक्षक के. बी. डाबेराव यांच्या नेतृत्वाखालील पथक तेथे रवाना झाले. मात्र पुढील तपासात आरोपी गुवाहाटीकडे गेल्याचे स्पष्ट झाल्याने पथकाने तातडीने गुवाहाटीकडे मोर्चा वळवला आणि मोहम्मद इमरान इरफान शेख (वय 24, रा. मलीकापूर गल्लीपुरा प्यादया पाडा, कोलकाता) यास ताब्यात घेतले.

चौकशीत आरोपीने चोरी केलेला लॅपटॉप कोलकात्यातील चांदणी मार्केटमध्ये विकल्याची कबुली दिली. त्यानुसार पोलिसांनी लॅपटॉप खरेदी करणारा शेख अफताब अली (वय 30, रा. कॉलीन स्टेट, कोलकाता) यास देखील अटक करून न्यायालयासमोर हजर केले.

या मोहिमेत पोलिसांनी एक लॅपटॉप, मोबाईल फोन आणि एटीएम कार्डे असा एकूण 35 हजार रुपयांचा मुद्देमाल हस्तगत केला आहे. या कारवाईत अपर पोलीस आयुक्त मनोज पाटील, उपपोलीस आयुक्त सोमय मुंडे, सहाय्यक पोलीस आयुक्त विठ्ठल दबडे यांच्या मार्गदर्शनाखाली वरिष्ठ पोलीस निरीक्षक चंद्रशेखर सावंत आणि पोलीस निरीक्षक (गुन्हे) अलका सरग यांच्या सूचना पथकाला देण्यात आल्या होत्या.

कारवाईत सहायक पोलीस निरीक्षक के. बी. डाबेराव, पोलीस अंमलदार बाबा आहेर, किसन शिंगे, गणेश गायकवाड, अतुल इंगळे, गजानन अवातिरक, प्रदीप खरात, प्रितम निकाळजे, शरद राऊत आणि रोहित पाथरुट यांनी सक्रिय सहभाग नोंदवला. या तपासामुळे बाणेर परिसरातील घरफोडीप्रकरणी पोलिसांनी एक मोठा धागा मिळवत आरोपीला गजाआड केले आहे.