राजीव लाला आणि आर. शालिनी देवी हे दोघेही निवृत्त केबिन क्रू सदस्य होते. शालिनी देवी वकीलही होत्या. दोन तासांच्या भांडणानंतर राजीवने शालिनी देवीचा गळा दाबून खून केला. त्यांच्या शरीरावर 11 जखमांच्या खुणा आढळल्या आहेत. लालाने पोलिसांच्या चौकशीत सांगितलं की, हा खून पूर्वनियोजित नव्हता. पत्नीने त्याच्यासोबत पुन्हा एकत्र येण्यास नकार दिल्याने रागाच्या भरात हे घडले.
Heart Attack : दहावीतल्या भावाचा मृत्यू, धक्क्यातून सख्ख्या दादाचंही हार्ट अटॅकने निधन, गर्भवती वहिनी जागेवरच कोसळून…
राजीव आणि शालिनी यांनी घटस्फोट घेतल्यानंतर पुन्हा एकदा लग्न केलं होतं. पण दुर्दैवाने, सुमारे 15 वर्षांपूर्वी ते पुन्हा विभक्त झाले होते. शालिनी देवीचे मित्र आणि वकील अजित जाधव यांनी पोलिसांच्या भूमिकेवर प्रश्नचिन्ह उपस्थित केले आहे. त्यांनी दावा केला आहे की, 27 सप्टेंबर रोजी झालेल्या खुनापूर्वी तीन दिवस आधी, म्हणजेच 24 सप्टेंबर रोजी, त्यांनी लालाविरुद्ध पोलिसांकडे तक्रार दिली होती. जाधव यांच्या मते, पोलिसांनी त्यावेळी तातडीने कारवाई केली असती तर शालिनी देवीचा जीव वाचू शकला असता.

अजित जाधव यांनी सांगितले की, गेल्या दहा वर्षांत लालाविरुद्ध किमान चार NC (non-cognisable) गुन्हे दाखल झाले होते. जाधव यांनी लालाच्या वागणुकीबद्दल अधिक माहिती दिली. ते म्हणाले, “कामाच्या ठिकाणी गंभीर परिणामांना सामोरं जावं लागेल, या भीतीपोटी त्याने शालिनीचा पाठलाग करणं आणि तिला त्रास देणं थांबवलं होतं, पण निवृत्त होताच तो निडर झाला. शालिनी आणि मी 24 सप्टेंबर रोजी पोलिसांकडे गेलो होतो, त्याच्याविरुद्ध कठोर कारवाईची मागणी करत होतो, कारण आम्हाला तिच्या जीवाला धोका असल्याची भीती होती.”

यावर पोलिसांनी आपली बाजू मांडली आहे. पोलिसांनी सांगितले की, शालिनी देवीने लालाविरुद्ध नियमितपणे घरगुती तक्रारी दाखल केल्या होत्या. पोलिसांनी त्याला अनेक वेळा ताकीद दिली होती. 24 सप्टेंबर रोजीच्या तक्रारीनंतर, पोलिसांनी राजीवला ‘chapter proceedings’ (संभाव्य त्रास थांबवण्यासाठी प्रतिबंधात्मक उपाय) सुरू करण्याची धमकी दिली होती. एका पवई पोलीस अधिकाऱ्याने सांगितले की, “हे घरगुती वादाचे प्रकरण होते, मात्र त्याचा शेवट खुनाने झाला” आरोपी राजीव लाला यास आर्थर रोड जेलमध्ये पाठवण्यात आले आहे.