या चर्चांवर आमदार पठारे यांनी यापूर्वीच ‘ही फक्त अफवा आहे’ असा खुलासा केला होता. मात्र पक्षातील हालचालींवरून पाहता काहीतरी मोठं शिजत असल्याचे संकेत मिळत आहेत. काही वरिष्ठ नेते या प्रवेशासाठी सकारात्मक असल्याचं सांगितलं जातंय, तर स्थानिक नेतृत्व हा प्रवेश रोखण्यासाठी थेट मुंबईपर्यंत प्रयत्न करत आहे. यामुळे पक्षातील मतभेद आणि अंतर्गत वाद उफाळले आहेत.

अनेक वर्षांपासून पक्षाशी निष्ठा राखून काम करणाऱ्या कार्यकर्त्यांमध्ये या संभाव्य प्रवेशामुळे अस्वस्थता पसरली आहे. “वारे बदलले की पक्ष बदलणाऱ्यांना संधी मिळते, पण वर्षानुवर्षे काम करणाऱ्यांचं काय?” असा सवाल स्थानिक नेते विचारत आहेत. अनेक इच्छुक उमेदवार आणि पदाधिकारी वरिष्ठ नेतृत्वाची भेट घेऊन आपली भूमिका मांडत आहेत. अलीकडेच वडगाव शेरीतील शिष्टमंडळाने शहराध्यक्षांची भेट घेऊन, “बाहेरील लोकांना घेऊ नका; स्थानिक निष्ठावंतांना संधी द्या,” अशी मागणी केली.

भाजपच्या वाढत्या संघटनेत बाहेरून येणाऱ्या नेत्यांना स्थान देणं हे काही नवीन नाही. मात्र प्रत्येक ‘इन्कमिंग’सोबत संघटनेतील जुने कार्यकर्ते नाराज होतात. स्थानिक स्वराज्य संस्थांच्या निवडणुकीत जागा मर्यादित असतात आणि इच्छुकांची संख्या मोठी. त्यामुळे नव्या चेहऱ्यांना स्थान मिळाल्यास जुने कार्यकर्ते नाराज होतात, त्याचा थेट परिणाम पक्षाच्या मतांवर होतो.

राजकीय पातळीवर या प्रवेशामागे दोन प्रमुख कारण आहेत. यात पहिले शहरातील काही मतदारसंघात प्रभाव वाढवण्यासाठी बाहेरून प्रभावशाली नेते आणणे आणि दुसरे म्हणजे विद्यमान नेत्यांचे समीकरण आणि त्यांच्या गटातील उमेदवारांची तिकिटे वाचवण्याची धडपड. या चर्चांमुळे पक्ष नेतृत्वावर मोठं दबावाचं वातावरण आहे. एकीकडे मतदारसंघात प्रभाव असलेल्या बाहेरील नेत्यांना घेऊन पक्ष बलवान करण्याची रणनीती, तर दुसरीकडे वर्षानुवर्षे काम करणाऱ्या निष्ठावंतांचा रोष या दोन्ही टोकांमध्ये भाजपचे शहर नेतृत्व अडकले आहे.
Pune News : पुणे महापालिका निवडणुकीत अजितदादा स्वबळावर? शिवसेना-भाजप युतीचे संकेत, इच्छुक म्हणतात…
“आम्ही अनेक वर्षांपासून पक्षासाठी काम करत आहोत. बाहेरील लोकांना घेतल्यास आमचं मनोबल खचेल. पक्षाने भूमिका स्पष्ट करून निष्ठावंतांना विश्वास द्यावा,” अशी मागणी कार्यकर्त्यांकडून शहराध्यक्ष आणि मंडळ अध्यक्षांकडे लेखी स्वरूपात करण्यात आली आहे.
Pune News : 10 मिनिटं सिरिअल, 20 मिनिटं जाहिराती, काहीतरी करा ना, पुणेकर आजींची निरागस तक्रार, सुप्रिया सुळे म्हणाल्या…
सध्या हा प्रवेश चर्चेपुरता मर्यादित असला, तरी भाजपच्या अंतर्गत समीकरणावर याचा ठळक परिणाम दिसून येतोय. जर हा प्रवेश खरा ठरला, तर पुणे भाजपसमोर नवी राजकीय समीकरणं आणि अंतर्गत वाद मिटवण्याची मोठी कसोटी असेल. स्थानिक निवडणुकीपूर्वीची ही अस्वस्थता पक्षाच्या संघटनेला एकत्र ठेवण्यात नेतृत्व कितपत यशस्वी ठरतं, हेच पाहणं महत्त्वाचं ठरणार आहे.