जखमींची नावे ताराबाई पांडुरंग गोंडे (७९), गुणाबाई आनंद कुरेकर (५६), सुंदराबाई विठ्ठल डाखरे (६३), अंकुश सुरेश मेश्राम (३२), शोभा यशवंत बोबडे (६३), यश बोबडे (४) आणि कुमारी डांगे (४) अशी आहेत. यापैकी ताराबाई गोंडे आणि शोभा बोबडे यांची प्रकृती गंभीर असून त्यांना जिल्हा सामान्य रुग्णालयात हलविण्यात आले आहे. उर्वरित जखमींवर वरोरा उपजिल्हा रुग्णालयात उपचार सुरू आहेत. काहींना प्राथमिक उपचारानंतर खासगी रुग्णालयात हलविण्यात आले आहे.

देवी विसर्जनावेळी भीषण अपघात, एकाचवेळी 13 जण बुडाले, कुटुंबाच्या डोळ्यादेखत सारं संपलं

पाऊस आला आणि घडली दुर्घटना…

मिळालेल्या माहितीनुसार, शनिवारी सायंकाळी विसलोन गावात देवी विसर्जनाची मिरवणूक उत्साहात सुरू होती. त्याचदरम्यान पाऊस सुरू झाला. ओला होऊ नये म्हणून काही महिला आणि लहान मुले डीजेचे साहित्य ठेवलेल्या वाहनात आसरा घेऊ लागली. वाहन सुरू असतानाच अचानक जनरेटरचा स्फोट झाला आणि काही क्षणांतच आग व धूर पसरला.

घटनेची माहिती मिळताच माजरी पोलिस ठाण्याचे ठाणेदार अमित पांडे आणि पथक घटनास्थळी दाखल झाले. पोलिसांनी तत्काळ जखमींना वरोरा उपजिल्हा रुग्णालयात दाखल केले. प्राथमिक उपचारानंतर दोन गंभीर रुग्णांना जिल्हा रुग्णालयात हलविण्यात आले. दरम्यान, स्फोटामुळे वाहनाचे मोठे नुकसान झाले असून, परिसरात भीतीचे वातावरण निर्माण झाले आहे.

पावसामुळे स्फोट घडल्याची शक्यता

प्राथमिक तपासानुसार, पावसामुळे जनरेटर ओलसर झाल्याने शॉर्टसर्किट होऊन स्फोट झाला असावा, अशी माहिती पोलिसांकडून देण्यात आली आहे. स्फोटानंतर डीजेचे साहित्य आणि जनरेटर पूर्णतः निकामी झाले. या घटनेमुळे गावात शोककळा पसरली आहे. उत्साहात निघालेल्या मिरवणुकीत हा अपघात झाल्याने नागरिक हादरले आहेत. या दुर्घटनेनंतर पोलिसांनी पंचनामा करून जनरेटरचा तांत्रिक तपास सुरू केला आहे. ठाणेदार अमित पांडे यांच्या मार्गदर्शनाखाली स्फोटाचे नेमके कारण शोधण्याचे प्रयत्न सुरू आहेत.