असा असेल अमित शहांचा दौरा
केंद्रीय गृहमंत्री अमित शहा शनिवारी 4 ऑक्टोबर रोजी गोव्यातून रात्री नऊ वाजता शिर्डी विमानतळावर पोहोचणार असून त्यानंतर शिर्डीतील एका पंचतारांकित हॉटेलमध्ये जेवण व मुक्काम करणार आहे. 5 ऑक्टोबर रोजी सकाळी साई समाधी मंदिरात दर्शनासाठी जाणार असून त्यानंतर मोटारीने लोणी येथे पोहोचणार आहे. तेथे पद्मश्री विठ्ठलराव विखे पाटील आणि पद्मभूषण बाळासाहेब विखे पाटील यांच्या पूर्णाकृती पुतळ्याचे अनावरण करणार असून विखे कारखान्याच्या विस्तारित प्रकल्पाचे शुभारंभ शहांच्या हस्ते होईल. त्यानंतर उपस्थितांना ते संबोधित करतील.कार्यक्रमानंतर विखे पाटलांच्या निवासस्थानी जेवण करून दुपारी हेलिकॉप्टरने कोपरगावला पोहोचणार असून संजीवनी कारखान्याच्या विविध प्रकल्पांचे शुभारंभ त्यांच्या हस्ते होईल. त्यानंतर अमित शहा उपस्थित शेतकऱ्यांना संबोधित करणार असून कार्यक्रम आटोपून हेलिकॉप्टरने शिर्डी विमानतळ येथे पोहचून विमानाने दिल्लीच्या दिशेने रवाना होणार आहे.

सुजय विखेंचे पुनर्वसन तर विवेक कोल्हेंसाठी खास घोषणा?
दरम्यान मागील वर्षी झालेल्या लोकसभा निवडणुकीत सुजय विखे यांचा पराभव झाल्यानंतर विधानसभा निवडणुकीत विखेंच्या नेतृत्वात जिल्ह्यात महायुतीचे अनेक आमदार निवडून आले आहे.त्यामुळे अमित शाह या दौऱ्यात सुजय विखे यांचे पुनर्वसनाची घोषणा करणार का? अशी चर्चा असून मागील विधानसभा निवडणुकीत विवेक कोल्हे यांनी महायुतीच्या उमेदवारासाठी थांबण्याचा निर्णय घेतल्याने. विवेक कोल्हेंसाठी काही खास घोषणा गृहमंत्री अमित शहा करणार का? याची कोल्हे समर्थक आणि कोपरगावातील नागरिकांना उत्सुकता लागली आहे.

मुख्यमंत्र्यांसह या मंत्र्यांची उपस्थिती
आम्ही शहांच्या या दौऱ्यासाठी राज्याचे मुख्यमंत्री देवेंद्र फडणवीस उपमुख्यमंत्री एकनाथ शिंदे उपमुख्यमंत्री अजित पवार यांच्या सह महसूलमंत्री चंद्रशेखर बावनकुळे, केंद्रीय सहकार राज्यमंत्री मुरलीधर मोहोळ, भाजप प्रदेशाध्यक्ष रवींद्र चव्हाण, विधान परिषदेचे सभापती राम शिंदे,मंत्री गिरीश महाजन, मंत्री राधाकृष्ण विखे पाटील,मंत्री पंकजा मुंडे, मंत्री पंकज भोयर, केंद्रीय राज्यमंत्री रामदास आठवले, मंत्री बाळासाहेब पाटील, मंत्री जयकुमार गोरे आदींसह महायुतीचे खासदार जिल्ह्यातील आमदार आदींसह मान्यवर उपस्थित राहणार आहे.