मी कपड्यांची इस्री सांभाळणारा नेता नाही. व्हॅनिटी घेऊन दौरा करणारा मी नाही. मी घरात बसून फेसबुक लाईव्ह करणारा नेता नाही. बाळासाहेब आम्हाला सांगायचे, संकट काळात नेता घरात नाही, तर जनतेच्या दारात शोभून दिसतो. बाळासाहेबांचे तेच विचार घेऊन आम्ही वाटचाल करत आहोत. संकट काळात हजारो शिवसैनिक पूरग्रस्तांना मदत करत आहेत. त्या शिवसैनिकांचा मला सार्थ अभिमान आहे, अशा शब्दांत शिंदे यांनी त्यांच्या शिवसैनिकांचं कौतुक केलं.

तुम्ही शेतकऱ्यांना काय मदत केली, असा प्रश्न शिंदे यांनी ठाकरेंना नाव न घेता विचारला. ‘आम्ही पूरग्रस्तांना मदत केली. त्यांना मदतीचे किट पाठवले. विरोधकांना त्या किटवरचे फोटो दिसले. पण त्या किटमधलं सामान दिसत नाही. त्या किटमध्ये २६ प्रकारच्या जीवनावश्यक वस्तू होत्या. त्यात गहू, तांदूळ, साखर, मीठ यांच्यासह साड्या, ब्लँकेट कपडे होते. तुम्ही पूरग्रस्तांना काय दिलंत? शेतकऱ्यांना भेटायला मोकळ्या हातानं गेले आणि तोंड वाजवत परत आले. आम्ही शेतकऱ्यांना मदतीचे किट दिले. त्यांनी किटवरच्या फोटोवरुन टीका केली. बरोबर आहे. फोटोग्राफरला दुसरं काय देणार, त्यांना फक्त फोटोच दिसणार, असा सणसणीत टोला शिंदे यांनी ठाकरेंना लगावला.

सध्या ते जिथे जाईल, तिथे लोकांना सांगतात, माझ्याकडे आता द्यायला काहीच नाही. माझे हात रिकामे आहेत. तुमच्याकडे असताना तरी तुम्ही कोणाला काय दिलं, किती लोकांना मदत केली. देण्यासाठी, मदत करण्यासाठी दानत लागते. आम्ही लोकांना दोन्ही हातांनी देतो. आम्ही देना बँक आहोत. लेना बँक नाही. मुंबई महापालिका मागील ३० वर्षे ओरबाडली. ते पैसे गेले कुठे? लंडनला गेले का?, असा सवाल शिंदेंनी विचारला. दसरा मेळाव्याला ठाकरेंनंतर भाषण करुन त्यांना प्रत्युत्तर देण्याची परंपरा शिंदे यांनी कायम ठेवली.