पुरामुळे उद्ध्वस्त झालेल्या शेतकऱ्यांना, लोकांना आम्ही मदत केली. त्यांना मदतीचे किट पाठवले. पण काहींना त्या किटवरील आमचे फोटो दिसले. पण त्या किटमधील सामान दिसलं नाही. अरे त्या किटमध्ये २६ जीवनावश्यक वस्तू होत्या. तुम्ही शेतकऱ्यांसाठी एक साधा बिस्किटाचा पुडा तर नेला का, असा सवाल एकनाथ शिंदे यांनी ठाकरेंना विचारला. शेतकऱ्यांच्या भेटीला गेले. पण पायाला चिखल लागू नये म्हणून तिथे रॅम्प टाकला होता. पूरग्रस्तांना भेटायला गेले आणि रॅम्पवॉक करुन आले, असा खोचक टोला शिंदे यांनी ठाकरेंना लगावला.

मी संकट काळात घरी बसत नाही. फेसबुक लाईव्ह तर मुळीच करत नाही. आम्ही बांधावर जाऊन शेतकऱ्यांचे अश्रू पुसतो. त्यांना आमच्या मदतीच्या किटवरचे आमचे फोटो दिसले. फोटोग्राफरला दुसरं काय दिसणार? त्यांना फोटोच दिसणार, अशा शब्दांत शिंदेंनी ठाकरेंना चिमटा काढला. आम्ही शेतकऱ्यांना, पूरग्रस्तांना मदत केली. लोकांचे संसार उभे केले, असं शिंदे म्हणाले. यावेळी व्यासपीठावर एक लहानसा व्हिडीओ दाखवण्यात आला. त्यात शिंदेसेनेकडून पूरग्रस्तांना दिली जाणारी मदत दिसत होती. पूरग्रस्तांनी त्याबद्दल शिंदे आणि त्यांच्या कार्यकर्त्यांचे आभार मानले. त्यात शिंदेसेनेकडून देण्यात आलेले मदतीचे किटदेखील दिसत होते. त्यावर शिंदे यांचा फोटो होता. फोटो असलेल्या याच किटवर ठाकरेसेनेनं आक्षेप घेत टिकेची झोड उठवली होती.