मृत रिक्षाचालकाचे नाव सय्यद इमरान सय्यद शकील (वय 38, रा. साधाचनगर, रेल्वे स्टेशन परिसर) असे असून, तो बुधवारी रात्री आपल्या 11 वर्षीय मुलगी आणि आठ वर्षीय मुलाला घेऊन घरी जात होता. रात्री आठच्या सुमारास रेल्वे स्टेशन उड्डाणपुलाखाली त्याच्या रिक्षेला एका चारचाकी वाहनाने अडवले.
पूर ओसरल्यावर मोहटादेवीला जा, मावशीने नकार दिल्याचा राग, मायबापाविना वाढलेल्या लेकराने लिंबाच्या झाडावर आयुष्य संपवलं
क्षणात कारमधून चार-पाच जण खाली उतरले. त्यांनी कोणतीही चर्चा न करता थेट इम्रानवर कोयत्याने हल्ला केला. पहिल्याच वारात त्याचा हात मनगटापासून तुटला. त्यानंतर मागून डोके आणि मानेवर कोयता व तलवारीने सपाप वार करत इम्रानला रक्ताच्या थारोळ्यात लोटले. काही क्षणांतच त्याचा जागीच मृत्यू झाला. आरोपी मात्र हल्ल्यानंतर आपल्या गाडीत बसले आणि घटनास्थळावरून पसार झाले.

खून जुन्या वादातून?

या घटनेमुळे परिसरात भीती आणि गोंधळाचे वातावरण निर्माण झाले. रात्रीची वेळ असूनही त्या रस्त्यावर वर्दळ होती. घटनेची माहिती मिळताच पोलिस उपायुक्त प्रशांत स्वामी, सहायक आयुक्त मनीष कल्याणकर आणि सातारा पोलीस ठाण्याचे निरीक्षक कृष्णा शिंदे घटनास्थळी दाखल झाले. प्राथमिक चौकशीत मृत इम्रानवरही काही गुन्हे दाखल असल्याचे पोलिसांकडून समजले आहे. हा खून जुन्या वादातून घडला असावा, असा अंदाज वर्तविण्यात येत आहे.

आरोपींचा शोध सुरू

या हत्येनंतर पोलिसांनी संशयित आरोपींच्या हालचालींचा मागोवा घेण्यास सुरुवात केली आहे. त्यासाठी तातडीने तीन विशेष पथके तयार करण्यात आली असून, आरोपींना पकडण्यासाठी सर्वत्र जाळे पसरवले असल्याची माहिती पोलिसांनी दिली.

एका बापाचा जीव दोन निष्पाप मुलांच्या डोळ्यांसमोर घेतला गेला आणि त्यांनी असहाय्यपणे सर्व पाहिले. या अमानवी घटनेमुळे संपूर्ण जिल्हा हादरला आहे.