नाशिकच्या ओझर विमानतळावरून सध्या इंडिगो कंपनीची सेवा सुरू असून, नवी दिल्ली, हैदराबाद, गोवा, नागपूर, बेंगळुरू, अहमदाबाद आदी ठिकाणांसाठी विमानसेवा दिली जात आहे. काही महिन्यांपूर्वी नाशिक-इंदूर-जयपूर विमानसेवा खंडित झाली होती, तर नवी दिल्ली विमानतळावरील धावपट्टीचे काम सुरू असल्याने नाशिक-नवी दिल्ली विमानसेवाही रोजऐवजी आठवड्यातून तीनच दिवसांवर मर्यादित करण्यात आली होती. मात्र, आता या सेवा पूर्ववत होत असून, ‘इंडिगो’ने आपल्या हिवाळी मोसमाच्या वेळापत्रकात त्यांचा समावेश केला आहे. त्यानुसार २८ ऑक्टोबरपासून नाशिक-इंदूर-जयपूर व नाशिक-हैदराबाद अतिरिक्त विमान सुरू होईल.

हैदराबादसह नवी दिल्लीसाठीही अतिरिक्त विमान सुरू होणार असल्याची घोषणा झाली होती. ते रात्री नाशिक येथून प्रयाण करणार आहे. त्यामुळे नाशिककरांना दिल्लीत दुसऱ्या दिवशी सकाळी लवकर कामे सुरू करता येणार असल्याचे सांगण्यात आले होते. मात्र, या विमानाच्या वेळा अद्याप जाहीर होऊ शकल्या नाहीत. मात्र, या विमानाबाबतची कार्यवाही अंतिम टप्प्यात असून, तेदेखील २८ ऑक्टोबरपासूनच सुरू होईल. त्याच्या वेळाही लवकरच घोषित होतील, असे ‘निमा’चे उपाध्यक्ष मनीष रावल, ‘तान’चे अध्यक्ष सागर वाघचौरे यांनी सांगितले.
पंचवटी गोळीबार प्रकरणात पोलिसही सहभागी? अमरावतीतील तिघे निलंबित; चौकशीत नवे धक्कादायक खुलासे!
…अशा आहेत वेळा
जयपूर-इंदूर-नाशिक विमान जयपूर येथून सकाळी ११.४५ वाजता निघून दुपारी १.१० वाजता इंदूरला पोहोचेल. तेथून १.३० वाजता भरारी घेऊन ते २.४० वाजता नाशिकला उतरेल. हे विमान दुपारी ३ वाजता नाशिक येथून भरारी घेणार असून, ते सायंकाळी ४.१५ ला इंदूरला पोहोचेल. तेथून ते ४.३५ वाजता उड्डाण घेऊन सायंकाळी ६ वाजता जयपूरला उतरेल. तर हैदराबाद-नाशिक विमान हैदराबाद येथून सकाळी ६.५० वाजता भरारी घेऊन ८.४० वाजता नाशिकला पोहोचेल. हेच विमान नाशिकहून सकाळी ९ वाजता निघून १०.४५ वाजता पुन्हा हैदराबादला परतेल.