राष्ट्रीय स्वयंसेवक संघाची यंदा शताब्दी असल्याने विजयादशमी सोहळ्याला विशेष महत्त्व प्राप्त झाले आहे. अमरावतीचा विजयादशमी सोहळा ५ ऑक्टोबर रोजी किरणनगरातील श्रीमती नरसम्मा महाविद्यालयाच्या मैदानावर होत आहे. या सोहळ्याचे कमलताईंना निमंत्रण देण्यात आले. पत्रिकेतही त्यांचे नाव आहे. त्यांची भेट घेऊन रीतसर विचारणा करण्यात आली. त्यांनी होकार दिल्यानंतर पत्रिका प्रकाशित झाल्याचे संघाचे म्हणणे आहे.

आंबेडकरी समुदायाला संघाचे विचार मान्य नाही असे सांगत कमलताईंनी संघाच्या विजयादशमी उत्सवाला जाऊ नये, असे सोशल मीडियावरून आवाहन केले जात आहे. रविवारी कमलताईंच्या नावाने एक हस्तलिखित पत्रही व्हायरल झाले. यात ‘संघाने विश्वासात न घेता, लेखी होकार न घेता पत्रिका प्रकाशित केला’, असे म्हटले होते. हे पत्र कमलताईंचे नसल्याचीही चर्चा झाली. कमलताईंचे पती; रिपाइंचे ज्येष्ठ नेते दिवंगत रा. सू. गवई हे संघाच्या १९८१ साली झालेल्या द्वितीय संघशिक्षा वर्गाच्या समारोप समारंभाला प्रमुख पाहुणे म्हणून उपस्थित होते. त्या कार्यक्रमाचे छायाचित्रही व्हायरल झाले.

या सगळ्या घडामोडींच्या पार्श्वभूमीवर डॉ. राजेंद्र गवई यांनी सोमवारी आपली भूमिका स्पष्ट केली. ‘संघाच्या कार्यक्रमाला गेल्याने विचारधारा बदलत नाही. कमलताई यांनी कार्यक्रमाला जाण्यास हरकत नाही. एक मुलगा आणि रिपाइंचा महासचिव म्हणून त्यांच्या पाठीशी आहे’, असे त्यांनी नमूद केले.

‘…हा तर संविधानाशी द्रोह’

कुठल्याही आंबेडकरी समुदायातील लोकांनी राष्ट्रीय स्वयंसेवक संघाशी संबंध जोडणे अजिबात मान्य नाही. त्यांच्या व्यासपीठावर जाणारे हे लोक संधीसाधू आहेत. स्वत:च्या भ्रष्टाचारापासून संरक्षण मिळविण्यासाठी त्यांच्याशी संबंध साधतात. संघ आणि भाजप तुमचा कसा वापर करून घेत आहे, हे तुम्हाला माहिती आहे काय? त्यांना बहुजनांचे राजकारण संपवायचे आहे. त्यांच्या व्यासपीठावर जाऊन सोबत करणे म्हणजे संविधानाशी द्रोह आहे. त्यांची ताकद वाढविण्याचे काम यानिमित्ताने होणार आहे, असे मत एका ज्येष्ठ आंबेडकरी विचारवंताने व्यक्त केले.राष्ट्रीय स्वयंसेवक संघाच्या रचनेनुसार कमलताई यांना भेटून त्यांची परवानगी घेण्यात आली. त्यांनी होकार दिल्यानंतरच पत्रिकेवर नाव दिले. त्या नक्की येणारच!
संजय गुळवे, राष्ट्रीय स्वयंसेवक संघाचे विदर्भ प्रांत प्रचार प्रमुख