मुंबईतील पवई भागात एका निवृत्त एअरलाइन कर्मचाऱ्याने त्याच्या पत्नीची हत्या केली. या दोघांमध्ये 30 वर्षांपासून दुरावा होता. पत्नीची हत्या केल्यानंतर आरोपी पती घटनास्थळावरून पळून गेला. मात्र, पोलिसांनी या प्रकरणाच्या तपासादरम्यान त्याला अटक केली आहे. पोलिसांच्नी दिलेल्या माहितीनुसार, आरोपी पतीचे नाव राजीव चंद्रकांत लाला असे आहे. तर मृत पत्नीची ओळख 54 वर्षीय शालिनी देवी अशी झाली आहे.
Pune News: पुण्यात हॉस्टेलमध्येच परिचारिकेने आयुष्य संपवलं, प्रियकरावर गुन्हा दाखल, कारण काय?
पोलीस तपासादरम्यान असं समोर आलं की, या जोडप्याने 1993 मध्ये लग्न केले होते. परंतु घरगुती वादामुळे 1995 पासून ते वेगवेगळे राहत होते. शनिवारी (27 सप्टेंबर) रात्री राजीव काही कागदपत्रे घेण्यासाठी पवई येथील त्याच्या पत्नीच्या घरी गेला होता. तेव्हाही या दोघांमध्ये वाद झाला आणि रागाच्या भरात राजीवने उशीने शालिनीचं तोंड दाबून त्यांची हत्या केली. पत्नीची हत्या केल्यानंतर आरोपी घटनास्थळावरून पळून गेला.

याप्रकरणी डीसीपीने सांगितले की, आरोपी घटनास्थळावरून पळून गेला. पण, तो त्याचा मोबाईल फोन आणि कारच्या चाव्या तिथेच सोडून गेला. पोलीस आल्यावर त्यांनी या वस्तू जप्त केल्या आणि तपास सुरू केला. या दोन पुराव्यांच्या आधारे पोलिसांनी तपास केला आणि आरोपी पतीला अटक केली आहे. डीसीपींनी सांगितले की, चौकशीदरम्यान आरोपीने आपला गुन्हा कबुल केला. त्याच्याविरुद्ध खुनाचा गुन्हा दाखल करण्यात आला आहे.

पोलीस तपासात असे दिसून आले आहे की, वेगळे राहूनही हे जोडपे अनेकदा भांडत होते. त्यांच्यात मालमत्तेचा वाद सुरु होता. आरोपी पतीने यापूर्वीही महिलेवर अनेक वेळा हल्ले केले होते. पोलिसांनी सांगितले की, आरोपी पतीची चौकशी सुरू आहे. आतापर्यंत त्याने फक्त हत्येची कबुली दिली आहे. पुढील तपास सुरु आहे.