मिरा रोड येथे पती मुलासह राहणाऱ्या या 23 वर्षीय महिलेचे पतीसोबत पटत नव्हते. या कालावधीत तिची प्रियंक पटेल याच्याशी ओळख झाली आणि त्यानंतर दोघांनी लिव्ह इनमध्ये राहण्याचा निर्णय घेतला. गेल्या एका महिन्यापासून सदर तरुणी आणि प्रियंक हे मालाडमधील जुलूसवाडीतील एका चाळीत राहत होते. लिव्ह इनमध्ये राहताना पतीशी सगळे नाते तोडावे लागतील, अशी अट पटेल याने ठेवली होती. मात्र दोन दिवसांपूर्वीच आपली प्रेयसी पतीस भेटण्यासाठी मिरा रोड येथे गेल्याचे त्यास समजताच त्याने तिच्यासोबत वाद घातला. त्यानंतर तिला मारहाण करत तापाच्या गोळ्या खाण्याची जबरदस्ती केली. तसंच वायरने तिच्या मुलाचा गळा घोटण्याचा प्रयत्न केला.

दरम्यान, यावेळी महिलेने पोलिस नियंत्रण कक्षास संपर्क केल्यानंतर पोलिस तिथे पोहोचले व तरुणीसह तिच्या मुलाची तिथून सुटका केली. या दोघांना उपचारासाठी कांदिवलीच्या डॉ. बाबासाहेब आंबेडकर (शताब्दी) रुग्णालयात दाखल करण्यात आले असून सध्या त्यांची प्रकृती स्थिर आहे. याप्रकरणी पोलिसांकडून अधिक तपास केला जात आहे.