कल्याणच्या महात्मा फुले चौक पोलीस ठाण्याच्या हद्दीत एक विद्यार्थीनी तिच्या आईसोबत राहते. ही मुलगी महाविद्यालयात शिक्षण घेत आहे. तिची ओळख इंस्टाग्रामच्या माध्यमातून राहूल भोईर याच्या बरोबर झाली. या ओळखीचे रूपांतर प्रेमात झाले. प्रेम झाल्यानंतर या राहूल भोईर याने मुली सोबत शरिरसंबंध प्रस्थापित केले. त्याचा व्हिडीओ त्याने तयार केला. हे सर्व एप्रिल महिन्यात घडले होते. या मैत्रीतून त्याने तिला त्याच्या प्रेमाच्या जाळ्यात अडकविले होते. या मुलीवर तो लैगिंक अत्याचार करतच होता. त्याचा वेळोवेळी व्हिडियो देखील तयार करत होता. तो व्हिडिओ राहुलने त्याचा दुसरा मित्र देवा पाटील याला पाठविला. देवा पाटीलने त्या मुलीशी संपर्क साधला. शिवाय व्हिडियो व्हायरल करण्याची धमकीही दिली. त्या बदल्यात ब्लॅकमेल करणाऱ्या देवानेही तिच्यावर लैगिंक अत्याचार केले.

त्यानंतर तर आणखी भयंकर घडले. हा व्हिडीओ पुढे अजित सुरवसे, गौरव सुरवसे, हर्षल पोळसे, जयेश मोरे आणि किरण सुरवसे यांनाही पाठविण्यात आला. त्यांनीही त्या मुलीला व्हिडीओ व्हायरल करण्याची धमकी दिली. त्या बदल्यात शरिरसुखाची मागणी करत तिच्यावर दबाव टाकला आणि लैंगिक अत्याचार केला. हे सगळे आरोपी मुरबाड आणि भिवंडी परिसरात राहणारे आहे. शिवाय आरोपी धनाढ्य कुटुंबातील आहेत.

या प्रकरणात कल्याणच्या महात्मा फुले पोलिसांनी सात जणांना अटक केली आहे. या सातही आरोपींना कल्याणच्या पोक्सो विशेष न्यायालयासमोर हजर करण्यात आले. न्यायालयाने सातही आरोपींना आठ दिवस पोलीस कोठडीत ठेवण्याचे आदेश दिले आहेत.

सामूहिक अत्याचारातून मुलगी गर्भवती

चौकशीदरम्यान आणखी एक धक्कादायक बाबही समोर आली आहे. सामूहिक अत्याचारांतून अल्पवयीन मुलगी गर्भवती राहिली होती. सततच्या अत्याचारांमुळे मुलगी पाच महिन्यांपासून आधीच मानसिक तणावाखाली होती. जेव्हा तिला कुटुंबीय विचारत होते की, काय झाले आहे, तेव्हा ही मुलगी घरच्या मंडळींना काहीच सांगत नव्हती. पण नंतर ही घटना तिच्या घरच्यांना कळली आणि पायाखालची वाळू सरकली. त्यांनी थेट कल्याणच्या महात्मा फुले चौक पोलिस ठाण्यात धाव घेतली. एप्रिल महिन्यापासून या मुलीवर अत्याचार सुरू होते. गेल्या पाच महिन्यांपासून तिचे शोषण सुरू होते, असे वृत्त आहे.