प्राथमिक तपासात असे दिसून येतेय की, या व्यक्तीला जबर मारहाण करून, हातपाय बांधून तलावात टाकण्यात आले आहे. खून करून पुरावा लपवण्याचा प्रयत्न करण्यात आला आहे. मृत व्यक्तीच्या शरीरावरील काही गोंदकाम पोलिसांच्या नजरेत आले आहे. डाव्या मानेवर ‘३०२’ असा टॅटू गोंदलेला आहे. उजव्या बाजूला ‘श्री’ असे गोंदलेले आहे. एका हातावर देखील काही अक्षरे लिहिलेली आढळली आहेत. या आधारे पोलीस आता मृताची ओळख पटवण्याचा प्रयत्न करत आहेत.

या घटनेने संपूर्ण जेजुरी परिसरात खळबळ उडाली आहे. तलावासारख्या गर्दीच्या ठिकाणी असा मृतदेह सापडल्याने नागरिकांमध्ये भीतीचे वातावरण आहे. तपासासाठी पोलिसांची विशेष पथके तयार करण्यात आली आहेत. या खुनाचा तपास वेगाने उलगडण्यासाठी जेजुरी पोलिसांनी तीन वेगवेगळी पथके राज्यभर रवाना केली आहेत. सहाय्यक पोलीस निरीक्षक दीपक वाकचौरे, पोलीस उपनिरीक्षक सर्जेराव पुजारी, नामदेव तारडे साहाय्यक फौजदार नंदकुमार पिंगळे, गणेश नांदे, दशरथ पुजारी यांचा या पथकात समावेश आहे.

वादातून झालेला नियोजित खूनाचा संशय

पोलिसांच्या प्राथमिक अंदाजानुसार हा राग, वैर किंवा गटांमध्ये झालेल्या वादातून झालेला नियोजित खून असण्याची शक्यता आहे. मात्र मृताची ओळख पटल्याशिवाय यामागचं खरं कारण स्पष्ट होणार नाही. जेजुरी पोलिसांनी नागरिकांना आवाहन केले आहे की, हरवलेल्या किंवा बेपत्ता व्यक्तींबाबत कुणाला माहिती असल्यास पोलिस ठाण्याशी तातडीने संपर्क साधावा.