नागपूरमध्ये झालेल्या पत्रकार परिषदेत विजय वडेट्टीवार यांनी स्पष्ट केले की, राज्य शासनाने काढलेला हा जीआर मागासवर्गीयांच्या अधिकारावर गदा आणणारा आहे. कोणीही कितीही म्हणलं की, जीआरमुळे ओबीसींना धक्का बसणार नाही, परंतु प्रत्यक्षात मोठे नुकसान झाले आहे. या जीआरच्या निषेधार्थ ओबीसी समाजाने रस्त्यावर उतरण्याचा निर्णय घेतला आहे.

बैठकीत ठरविण्यात आले की, १० ऑक्टोबरला नागपूरमध्ये ओबीसींचा भव्य महामोर्चा काढण्यात येणार आहे. हा मोर्चा यशवंत स्टेडियम येथून निघणार असून संविधान चौकात त्याचा समारोप होणार आहे. उमेश कोर्राम हे या मोर्चाचे समन्वयक असणार आहेत. वडेट्टीवार यांनी सांगितले की, हा मोर्चा ऐतिहासिक ठरणार असून, एक लाखांहून अधिक ओबीसी बांधव यात सहभागी होतील.

मोर्चासाठी कोणताही नेता, आयोजक किंवा प्रायोजक नसून, हा संपूर्णपणे ओबीसी समाजाचा मोर्चा राहणार असल्याचे वडेट्टीवारांनी नमूद केले आहे. ‘आम्ही पक्ष म्हणून नव्हे तर कार्यकर्ता म्हणून या लढाईत आहोत. ओबीसी समाजाच्या या आंदोलनात पक्षीय भूमिका बाजूला ठेवून मोर्चात सामील व्हावे,’ असे आवाहन वडेट्टीवार यांनी केले.

बैठकीत विदर्भातील सर्व जिल्ह्यांचे प्रतिनिधी सहभागी झाले होते. पुढील काळात २० सप्टेंबर रोजी मराठवाड्यात बैठक घेण्यात येणार असून, तिथेही मोर्चाच्या तारखा निश्चित होतील. तसेच मुंबईतही मोठ्या मोर्चा आयोजित करण्याची तयारी सुरू आहे.

या मोर्चाचे घोषवाक्य असेल, ‘आपल्या हक्कांसाठी ओबीसींनी आता लढावे किंवा मरावे.’ वडेट्टीवार यांनी स्पष्ट केले की, मुख्यमंत्री यांनी तातडीने चर्चा करून जीआर मागे घ्यावा. ‘जो कोणी या जीआरचे समर्थन करतो, तो ओबीसींच्या लढाईशी प्रामाणिक नाही,’ असे ठाम मत त्यांनी व्यक्त केले.