वृषभ दोशी मूळ सोलापूरचा आहे. पोलिसांनी त्याच्याविरुद्ध बलात्कार आणि इतर कलमांखाली गुन्हा दाखल केला आहे. न्यायालयाने त्याला एक दिवसाची पोलीस कोठडी सुनावली आहे.

पोलिसांनी सांगितले की, पीडितेच्या आरोपानुसार ती काही जणांसोबत NGO च्या एका ट्रेनिंग प्रोग्रामसाठी बिझनेस व्हिसावर गोव्यात आली होती. हे NGO दारिद्र्य निर्मूलन करण्यासाठी काम करते. ट्रेनिंग दिवर बेटावर होते. ती दिवरमधील एका रिसॉर्टमध्ये थांबली होती. तिथे तिची तब्येत बिघडली. त्यामुळे तिला जुन्या गोव्यातील एका खाजगी हॉस्पिटलमध्ये दाखल करण्यात आले.

तिच्या स्पॅनिश बहिणीने तक्रार केली की, 31 ऑगस्ट रोजी रात्री 10 वाजता हॉस्पिटलमध्ये आरोपी दोशीने तिच्या बहिणीचा लैंगिक छळ केला. पीडिता 29 ऑगस्ट रोजी हॉस्पिटलमध्ये दाखल झाली. ICU मध्ये उपचार घेत असताना, डॉक्टरने तिचे हॉस्पिटलचा गाऊन वर केला आणि तिला चुकीच्या पद्धतीने स्पर्श केला.

तक्रारीत म्हटले आहे की, डॉक्टरने “neurological sensitivity examination” करण्याच्या नावाखाली तिच्या प्रायव्हेट भागांना स्पर्श केला. त्यावेळी आयसीयूत असल्याने ती असहाय्य अवस्थेत होती.

उत्तर गोव्याचे SP राहुल गुप्ता यांनी सांगितले की, वृषभ दोशी गुन्हा केल्यानंतर गोव्यामधून पळून गेला होता. आम्ही एक टीम तयार केली. त्याला सोलापूरमध्ये शोधून अटक केली. त्याच्याविरुद्ध BNS च्या विविध कलमांखाली गुन्हा दाखल केला आहे. यात बलात्काराचाही समावेश आहे,” असे ते म्हणाले.

दरम्यान, हॉस्पिटलने एक निवेदन जारी करत म्हटले आहे की, “हेल्थवे हॉस्पिटलमध्ये दाखल असलेल्या एका महिलेने डॉ. व्ही. दोशी यांच्याविरोधात लैंगिक अत्याचाराची तक्रार केली आहे. तक्रार मिळाल्यानंतर डॉक्टरला निलंबित करण्यात आले आहे.

हॉस्पिटलने तिला पूर्ण पाठिंबा दर्शवला आहे. पोलिसांनी तक्रार दाखल करण्यासाठी तिला मदत केली. “ती अजूनही हेल्थवे हॉस्पिटलमध्ये उपचार घेत आहे. हॉस्पिटल तिला या कठीण काळात पूर्ण मदत करेल” असेही हॉस्पिटलने म्हटले आहे. या घटनेमुळे गोव्यात खळबळ उडाली असून या प्रकरणाचा अधिक तपास सुरू आहे