दोन-तीन तासांच्या प्रयत्नांनंतरही ही मूर्ती तराफ्यावर चढली नाही. त्यामुळे गेल्या अनेक तासांपासून लालबागच्या राजाचं विसर्जन रखडून पडलं आहे. गेल्या अडीच ते तीन तासांपासून राजाची मूर्ती ही समुद्राच्या पाण्यात आहे. हे पाहून आता भाविकांचे डोळे पाणावले आहेत. तर, मंडळाकडूनही हा अडथळा दूर करण्याचा प्रयत्न केला जात आहे. काही चुकलं असेल तर माफ कर, असं देवाला सांगण्यात येत आहे.

राजाच्या विसर्जनासाठी यंदा गुजरातहून एक विशेष प्रकारचा स्वयंचलित तराफा तयार करण्यात आला होता. हा तराफा अत्याधुनिक असून तो राजाला समुद्राच्या मधोमध घेऊन जाणार होता. मात्र, अनेक प्रयत्न करुन देखील लालबागचा राजा हा या तराफ्यावर विराजमान झाला नाही. त्यासाठी तब्बल दोन-अडीच तास प्रयत्न करण्यात आले. तेव्हापासून बाप्पा कमरेभर पाण्यात आहे. यामध्ये समुद्राला भरती आल्यानेही अडथळा निर्माण झाला.

रविवारी सकाळी साडे सात ते आठ वाजेदरम्यान लालबागचा राजा हा गिरगाव चौपाटीवर पोहोचला होता. तसेच, इतरही गणपती चौपाटीवर पोहोचले. लालबागच्या राजाच्या विसर्जनानंतर इतर गणपतींची विसर्जन होतं. मात्र, राजा हा या तराफ्यावर विराजमान न झाल्याने इतर गणपतींचं विसर्जन सुरु करण्यात आलं.

भरती ओसरल्यानंतर बाप्पाला पुन्हा एकदा तराफ्यावर चढवण्याचा प्रयत्न करण्यात येणार आहे. यासाठी लालबाग राजा मंडळाचे सर्व पदाधिकारी, कार्यकर्ते आणि कोळी बांधव तिथे जमले आहेत.

यापूर्वी कधीही असं काही घडलेलं नव्हतं. दरवर्षी लालबागचा राजा चौपाटीवर आल्यानंतर त्याच्या विसर्जनात कुठलीच अडचण न येता इतकी मोठी मूर्ती समुद्राच्या मधोमध नेऊन विसर्जन पार पडतं. मात्र, यंदा पहिल्यांदाच दुपारचे 12 वाजून गेले तरी बाप्पाचं विसर्जन अद्याप झालेलं नसल्याने भाविकांकडून देवाची माफी मागण्यात येत आहे.