20 वर्षीय आयुष ऊर्फ गोविंद गणेश कोमकर याचा राहत्या घराच्या परिसरात गोळ्या झाडून खून करण्यात आला. आयुष महाविद्यालयीन शिक्षण घेत होता. तो क्लासवरून घरी आला, तेव्हा त्याच्यावर हल्ला झाला

शुक्रवारी रात्री नाना पेठेतील श्री लक्ष्मी कॉम्प्लेक्स येथे ही घटना घडली. रात्री आठच्या सुमारास आयुष आपल्या मित्रासह कॉम्प्लेक्सच्या गेटवर उभा असताना दोघे शस्त्रधारी तिथे पोहोचले. त्यांनी थेट त्याच्यावर तीन गोळ्या झाडल्या. गंभीर जखमी अवस्थेत त्याचा मृत्यू झाला, तर एक जण जखमी झाला. घटनेनंतर आरोपी पसार झाले. ऐन गणेशोत्सवाच्या धामधुमीत आणि विसर्जन मिरवणुकीच्या गर्दीत झालेल्या या खुनामुळे शहरात खळबळ उडाली आहे.

शहरात गेल्या एक आठवड्यापासून ‘वनराज आंदेकरच्या खुनाचा बदला’ याविषयी चर्चा सुरू आहे. भारती विद्यापीठ पोलिसांच्या सतर्कतेमुळे बदल्याचा एक कट उधळण्यात आला. या प्रकरणात चार जणांना अटक करण्यात आली; तसेच खुनाच्या कटात सहभागी असलेल्यांची नावेही निष्पन्न झाली होती. आंदेकर टोळीच्या सदस्यांना पाच पिस्तुले पुरवण्यात आली होती. त्यातील दोन पोलिसांनी जप्त केली. तर, तीन पिस्तुले आणि आरोपींचा शोध सुरू होता. त्यापूर्वीच नाना पेठेत खुनाची घटना घडली. ऐन विसर्जन मिरवणुकीच्या पूर्वसंध्येला झालेल्या या खुनामुळे पुण्याच्या मध्यवर्ती भागात भीतीचे सावट पसरले आहे. शहरात कडेकोट पोलिस बंदोबस्त असतानाही हा प्रकार घडल्याने पोलिसांच्या कार्यक्षमतेवर प्रश्नचिन्ह उपस्थित झाले असून, गुन्हे शाखा अपयशी ठरल्याचे दिसून येते.

टोळीयुद्धात नातवाचा बळी

गणेश कोमकर याची पत्नी कुख्यात बंडू आंदेकर यांची मुलगी आहे. ती वनराज आंदेकर खून प्रकरणात आरोपी आहे. वनराजच्या खुनानंतर आंदेकर-कोमकर संबंध आणखी ताणले गेले. आंदेकर-गायकवाड संघर्षात बंडू आंदेकरच्या नातवाचा बळी गेला.
Kerala Woman VIDEO : बसमध्ये तरुणीच्या छातीकडे रोखून पाहत होता वृद्ध, सोशल मीडियावर व्हिडिओ व्हायरल, पुढच्या मिनिटाला तिने…

बदल्याची शपथ

एक सप्टेंबर २०२४ रोजी वनराज आंदेकर याचा नाना पेठेत डोके तालीम परिसरात कोयत्याने वार करून आणि गोळ्या झाडून खून करण्यात आला होता. या प्रकरणात सोम्या गायकवाड, गणेश कोमकर आणि इतर आरोपी होते. ‘वनराज’च्या अंत्यविधीवेळी आंदेकर टोळीच्या सदस्यांनी शस्त्रपूजन करून खुनाचा बदला घेण्याची शपथ घेतली होती. ही माहिती शहर पोलिस दलातील अधिकाऱ्यांना आणि गुन्हे शाखेलाही होती. त्यानुसार ‘वनराज’च्या खुनाला एक वर्ष पूर्ण होत असताना, भारती विद्यापीठ परिसरात आंदेकर टोळीने एकाच्या खुनाचा कट रचला होता. तो कट भारती विद्यापीठ पोलिसांमुळे उधळून लावण्यात आला होता. मात्र, नाना पेठेतील कट पोलिसांना उधळता आला नाही.
Crime News : 7 वर्षांच्या मुलाच्या आईला लग्नाचं आमिष, 27 वर्षीय इंजिनिअरचा विवाहितेवर दोन वर्षे लैंगिक अत्याचार, नवी मुंबईत गुन्हा
‘खुनाचा प्रकार नेमका कोणत्या गोष्टीतून घडला, याचा शोध घेतला जात आहे. दोन जणांनी आयुषवर गोळ्या झाडल्याची प्राथमिक माहिती आहे. स्थानिक पोलिसांसह गुन्हे शाखेची सहा पथके आरोपींचा शोध घेत आहेत. आयुष कोमकरच्या नातेवाइकांशी संपर्क साधून तक्रार घेण्याचे काम सुरू होते,’ असे गुन्हे शाखेचे उपायुक्त निखिल पिंगळे यांनी सांगितले.