हाके म्हणाले, कोणत्याही पक्षाची सत्ता आली तरी अर्थमंत्री अजित दादा पवार असतात. गावगाड्यात ओबीसी ५० टक्क्यांपेक्षा जास्त आहे, पण आम्हाला (obc) १ टक्क्याच्या पुढे तरतूद झालेली नाही. शरद पवार यांनी मनोज जरांगे नावाचं भुत महाराष्ट्राच्या मानगुटीवर बसवलं. अजितदादांनी वसंतराव नाईक महामंडळाला अजिबात पैसे दिले नाहीत, मात्र अण्णासाहेब पाटील महामंडळाला एकट्या बारामती अर्बन बँकेतून 162 कोटी रुपये देऊ केले. वसंतराव नाईक महामंडळाची मात्र तीन लाखांची कर्ज मंजूर करण्यात आले नाही. सारथीचे पालकत्व अजित पवारांनी घेतले तिला शेअर मार्केट सारखी बिल्डिंग उभी केली. मात्र आम्हाला एक हजार चौरस फुटाचे कार्यालय दिले. सारथीच्या पोरांना १०-१० लाख पीएचडीसाठी दिले.

मराठा समाज आणि ओबीसी आरक्षण काय संबंध? असा सवाल करत हाके यांनी मनोज जरांगे यांची भेट घेणाऱ्या खासदार सुप्रिया सुळे, बजरंग सोनवणे यांच्यावर टीका केली. रोहित पवारांसह अजित पवारांचे आमदारही जरांगेंच्या मदतीला होते, असा देखील आरोप करून फक्त एका प्रतिज्ञापत्राद्वारे जात बदलणार असल्याचा जीआर सरकारने काढला आहे.

मंडल आयोग शरद पवार यांनी लागू केला म्हटलं तर…

बारामतीत आमराई परिसरात मी जाणार आहे. तिथून जरांगेंना शिदोरी पाठवली होती, पण ती नाकारली होती. तिथली माती मी मस्तकाला लावणार असल्याचे म्हणत हाकेंनी ‘मंडल आयोग शरद पवार यांनी लागू केला, असं कोणी म्हटलं तर त्याचं कानफाड फोडा’ असे म्हटले आहे. बारामती तालुक्यातील पिंपरी गावात एक जण कुणबी सर्टिफिकेट काढून गावचा सरपंच झाला, असे म्हणत आमच्या पिढ्यांचे शोषण आता बास झाले, असा निनाद त्यांनी केला आहे.

अजित पवारांचा बाप काढला

काही दिवसांपूर्वी उपमुख्यमंत्री अजित पवार यांनी सुशोभीकरण केलेल्या कालव्याच्या ठिकाणी गोधड्या वाळायला घालू नका, असे आवाहन केले होते. त्यावर हाके यांनी हे कंपाऊंड तुझ्या बापाचं घरचं आहे का? असा प्रश्न करत वादग्रस्त वक्तव्य केले आहे. गेवराईत आमच्यावर अजित पवारांच्या आमदाराने हल्ला केला, असा आरोप करत ‘शरद पवार मते आमची घेतात आणि जरांगेंना पाठिंबा देतात,’ अशी हाकेंनी सडकून टीका केली आहे.