मराठा नेते मनोज जरांगे पाटील यांच्या 8 पैकी 6 मागण्या सरकारने मान्य केल्या आहेत. मनोज जरांगे पाटील यांच्यासाठी हा मोठा दिलासा आहे. पण मनोज जरांगे यांच्या आंदोलनामुळे मुंबईत आलेल्या गर्दीवरुन मुंबई हायकोर्टात सुनावणी पार पडली. यावेळी महत्त्वाचा युक्तिवाद पार पडला. मनोज जरांगे यांच्या वकिलांनी उद्यापर्यंतची मुदत मागितली आहे. ती मुदत मुंबई हायकोर्टानेही मान्य केली.
दोन सत्रात सुनावणी
मुंबई हायकोर्टात दोन सत्रात सुनावणी पार पडली. यापैकी पहिल्या सत्रात “दुपारी ३ वाजेपर्यंत आंदोलकांना आदेशाचे पालन करायला सांगा, अन्यथा आम्हाला न्यायालय अवमानाची कारवाई करावी लागेल आणि जरांगे यांना जबर दंड लावण्याचाही आदेश आम्हाला द्यावा लागेल. मुंबईकरांना शांतपणे त्यांचे जनजीवन जगू द्या”, असा इशारा मुंबई हायकोर्टाने दिला होता. “यापूर्वी पाचशे मोर्चे काढले, पण कधीही अशी परिस्थिती उद्भवली नाही. यापुढे कोणतेही आंदोलक बेशिस्तपणे वागणार नाहीत, याची हमी देऊ”, असे मनोज जरांगे पाटील यांच्या वतीने ज्येष्ठ वकील सतीश मानेशिंदे यांचे प्रभारी मुख्य न्यायमूर्ती चंद्रशेखर आणि न्यायमूर्ती स्वाती साठे यांच्या खंडपीठासमोर म्हणणे मांडले. यानंतर मुंबई हायकोर्टाच्या खंडपीठाने दुपारी 3 वाजता पुन्हा सुनावणी ठेवली.
दुसऱ्या सत्रात काय घडलं?
“मराठा आंदोलक शांततेत आंदोलन करत आहोत. आता अटीप्रमाणे जेवढे आंदोलक राहू शकतील तेवढेच आझाद मैदानात राहतील”, अशी हमी आंदोलकांचे वकील सतीश मानेशिंदे यांनी दिली. यावर कोर्टाने सवाल केला. “पण आता तुम्हाला आझाद मैदानातही आंदोलन करण्याविषयी परवानगीच मिळालेले नाही. मग कोणत्या अधिकारात तिथे आंदोलन करत आहात?”, असा प्रश्न कोर्टाने मराठ्यांच्या वकिलांना विचारला.
“केवळ पाच हजार आंदोलक राहतील, बाकी सर्वांनी नवी मुंबईत जावे, असे जरांगे यांच्यातर्फे सांगण्यात आले आहे. त्याप्रमाणे आंदोलकांनी निघणेही सुरू केले आहे”, अशी माहिती वकील मानेशिंदे यांनी कोर्टात दिली. “पण तुम्ही अजूनही आदेशाचे पालन केलेले नाही. कायद्याचे राज्य राहण्यासाठी आदेश पालन होणे आवश्यक आहे”, असं मत हायकोर्टाने मांडलं. त्यावर “विरेंद्र पवार यांनी परवानगी मिळण्यासाठी अर्ज केलेला आहे”, अशी माहिती वकील सतीश मानेशिंदेंनी यांनी दिली
यानंतर खंडपीठाने सरकारला आदेशाची अंमलबजावणी काय केली, याची माहिती द्या, असे सांगितल्यानंतर नोटीसा वगैरे बजावल्या होत्या, असे राज्याचे महाधिवक्ता बिरेंद्र सराफ यांनी सांगितले. “पोलिसांनी उद्घोषणा करून हायकोर्टाच्या आदेशाची माहिती दिली आणि आंदोलकांना रस्ते आणि जागा मोकळे करण्याचे आवाहन केले. त्याप्रमाणे आंदोलकांनी जाणे सुरू केले, मात्र अजूनही बरेच आहेत”, अशी माहिती सराफ यांनी दिली.
“सर्वांनीच पोलिसांच्या आवाहनाला दाद दिली नाही आणि हायकोर्टाच्या अंतरिम आदेशाचे पालन केले नाही. त्यामुळे पोलिसांसाठी अडचणीची परिस्थिती निर्माण झाली”, अशी माहिती महाधिवक्ता बिरेंद्र सराफ यांनी दिली.
कोर्टाकडून उद्यापर्यंत मुदत
“तुम्ही हमी देत आहात, म्हणून आम्ही उद्यापर्यंत मुदत देत आहोत. पण ठोस हमी हवी”, अशी सूचना खंडपीठाने मनोज जरांगे पाटील यांचे वकील सतीश मानेशिंदे यांना दिली.
“मनोज जरांगे यांनी यापूर्वीच जाहीरपणे आंदोलकांना सांगितले आहे. त्याचबरोबर आपल्या आंदोलनामुळे कोणालाच त्रास होणार नाही, याची काळजी घ्या. हायकोर्टाच्या निर्देशांचे पालन करा”, असेही जाहीरपणे सांगितले आहे, अशी माहिती मानेशिंदे आणि ज्येष्ठ वकील व्ही. एम. थोरात यांनी जरांगे आणि आयोजकांतर्फे हायकोर्टाला दिली.
हायकोर्टाने अंतिम आदेश काय दिला?
“मनोज जरांगे पाटील यांच्या आवाहनाप्रमाणे आंदोलन सुरू झाले. त्यांच्या चिथावणीमुळे पाच हजारांहून अधिकचा जमाव मुंबईत आला. याचे उत्तर त्यांना द्यावे लागेल. परंतु, त्यांच्या वकिलांनी विनंती केल्याप्रमाणे उद्या दुपारी 1 वाजता पुन्हा सुनावणी ठेवत आहोत, तोपर्यंत आदेश पालन व्हायला हवे. तसे झाले नाही तर आम्ही संकेत देतो की, जरांगे आणि अन्य प्रतिवादींविरोधात आम्ही कठोर कारवाईचा आदेश देऊ”, असा आदेश मुंबई हायकोर्टाने दिला.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा