आंदोलकांनी मुंबई छत्रपती शिवाजी महाराज टर्मिनस सह आसपासचा परिसर व्यापला. जरांगे पाटील यांनी शुक्रवारी सकाळी १०च्या सुमारास आझाद मैदानात उपोषणाला सुरुवात केली. मराठा आंदोलकांना पोलिसांनी आंदोलनासाठी एक दिवसाची परवानगी दिली होती. सायंकाळी मुंबई पोलिसांनी आणखी एक दिवसाची परवागनी दिली. त्यानंतर जरांगे यांनी सरकारवर जोरदार टीकास्त्र सोडले. ‘पुढील एक-दोन दिवस मी पाणी पित आहे. पण, सरकारने ताणले तर तेही बंद करून कडक उपोषण करेन. तुरुंगात टाकले तर तिथेही मरेपर्यंत उपोषण करेन, गोळ्या झाडल्या तर झेलून मृत्यूमुखी पडेन. पण, तडजोड करणार नाही’, असा इशारा त्यांनी सरकारला दिला.

‘हे असले भंगार खेळ खेळण्यापेक्षा सरकारने अस्सल डाव खेळावा आणि मराठ्यांना आरक्षण देऊन टाकावे. तुम्ही एक-एक दिवस परवानगी दिली तरी मागण्या पूर्ण होईपर्यंत उपोषण होणार आहे. मागण्यांची अंमलबजावणी होईपर्यंत उपोषण सुरू राहणार आहे. आज सिद्ध झाले की, मैदानात आंदोलन करायला देणे किंवा न देणे हे सरकारच्या हातात आहे’ असे जरांगे म्हणाले. ‘सरकारने शौचालये कुलूप लावून बंद केली, पाण्याची परिस्थिती तीच आहे. चहाचे, नाश्ता आणि जेवणाची दुकानेही बंद करण्यात आल्याचे कळले आहे. त्यामुळे आंदोलक हे सीएसटीला बसले होते. जेवायला मिळू नये, चहापाणी मिळू नये आणि मराठ्यांनी वैतागून निघून जावे, असे प्रयत्न आहेत, असा आरोपही जरांगे यांनी केला.गैरसमज पसरवण्याचे प्रयत्न
आंदोलकांबाबत गैरसमज पसरवण्याचा प्रयत्न सुरू आहे. मात्र, मराठ्यांची मुले काही म्हणणार नाहीत, ते माज घेऊन नव्हे तर वेदना घेऊन मुंबईत आले आहेत. मी मराठ्यांसाठी बलिदान देण्यासाठी तयार आहे. आता मी मरेन किंवा आरक्षण मिळवेन, असे जरांगे म्हणाले.
भाजपचा पहिला नेता मनोज जरांगे यांच्या भेटीला, मुंबईत हालचाली वाढल्या
लोकप्रतिनिधींची उपोषणस्थळी रीघ
आंदोलनाच्या पहिल्या शुक्रवारी मनोज जरांगे यांची सरकारच्या प्रतिनिधींनी किंवा मंत्र्यांनी भेट घेतली नसली तरी वेगवेगळ्या राजकीय पक्षांच्या लोकप्रतिनिधींची उपोषणस्थळी रीघ लागली होती. खासदार ओमराजे निंबाळकर, बजरंग सोनवणे, भास्कर भगरे, संजय जाधव यांच्यासह विधान परिषदेचे विरोधी पक्षनेते अंबादास दानवे, विजयसिंह पंडित, अभिजित पाटील, कैलास पाटील, प्रवीण स्वामी, प्रकाश सोळंके, संदीप क्षीरसागर आदी आमदारांनी उपोषणस्थळी जरांगे यांची भेट घेतली. मंत्रिमंडळ उपसमितीचे अध्यक्ष विखे-पाटील उपोषणस्थळी जाणार अशी चर्चा होती. मात्र, ते तिथे गेले नव्हते.

‘मुख्यमंत्र्यांचे कर्तृत्व काय ?’
‘मुख्यमंत्री देवेंद्र फडणवीस हे आम्हाला महाराष्ट्राचे संस्कार शिकवत आहेत. त्यांनी त्यांचे कर्तृत्व काय आहे ते सांगावे’, अशी टीका मनोज जरांगे यांनी केली. ‘फडणवीसांनी धनगरांना फसवले. त्यांच्या आरक्षणाच्या मागणीची पूर्तता केली नाही. कैकाडी समाज पश्चिम महाराष्ट्रात अनुसूचित जातीत आहे, तर मराठवाड्यात ओबीसीमध्ये आहे. शेतकरी आत्महत्या करतात हे फडणवीसांचे कर्तृत्व’, अशी टीका जरांगे यांनी केली. ‘सरकारने गोरगरिबांची मने जिंकण्याची योग्य वेळ आहे. फडणवीस यांनी आरक्षण दिले तर ‘वर्षा’ बंगल्यावर जाऊन गुलाल उधळू, असेही जरांगे म्हणाले.