एकनाथ शिंदे यांची प्रतिक्रिया

या नाराजी नाट्याबाबत एकनाथ शिंदे यांना पत्रकारांनी प्रश्न विचारला पण त्यांनी उत्तर देणं टाळलं आहे. राज्याच्या सर्वांगीण विकासासाठी महायुतीचं काम सुरु असल्याचं एकनाथ शिंदे म्हणाले आहेत. “अडीच वर्षांचं सरकार तुम्ही पाहिलेलं आहे. महायुतीची दुसरी इनिंग सुरु झाली आहे. यापूर्वीची पहिली इनिंग तुम्ही पाहिलेली आहे. विकासाच्या मुद्द्यालाच आम्ही पुढे घेऊन गेलो आहेत. महाराष्ट्राचा सर्वांगीण विकास कसा होईल यासाठी आमची टीम काम करत आहे”, असं एकनाथ शिंदे म्हणाले आहेत.

देवेंद्र फडणवीस यांचं म्हणणं काय?

केंद्राच्या अमृत योजनेच्या अंमलबजावणीत विलंब बोत असल्याचा मुख्यमंत्र्यांचं म्हणणं आहे. तसेच यामुळे त्यांनी अधकाऱ्यांच्या बैठकीत नाराजी व्यक्त केल्याची माहिती आहे. केंद्राकडून मिळालेल्या निधीचा पूर्ण उपयोग करा, अशा सूचना देवेंद्र फडणवीस यांनी दिल्या. तसेच पंतप्रधान नरेंद्र मोदी यांना मी आणि एकनाथ शिंदे काय उत्तर देणार? असा सवाल देवेंद्र फडणवीस यांनी अधिकाऱ्यांना केला.

विरोधकांची टीका, कारवाई करण्याची मागणी

दरम्यान, या वृत्तावर विरोधकांकडून टीका केली जात आहे. खासदार संजय राऊत यांनी शिंदेंवर कारवाई करण्याची मागणी केली आहे. “एकनाथ शिंदे हे नगरविकास मंत्री म्हणून पूर्णपणे अपयशी आहेत. नगरविकास खात्यातून मग एमएमआरडीए असेल, काही प्रकल्प असतील, नगरपालिका, महाापालिका यांचा निधी केंद्रातून आला असेल आणि त्यांनी तो निधी इतरत्र वळवला असेल, ठेकेदारांच्या माध्यमातून कमिशनगिरी केली असेल तर हा भ्रष्टाचार आहे. देवेंद्र फडणवीस यांनी त्यांना बडतर्फ केलं पाहिजे”, असं संजय राऊत म्हणाले.

खासदार सुप्रिया सुळे यांनी देखील कारवाईची मागणी केली आहे. “मुख्यमंत्री देवेंद्र फडणवीस यांनी त्यांच्याच सरकारमधील एका विभागावर नाराजी व्यक्त केल्याची माहिती समोर आली. मी त्यांचं अभिनंदन करते. नाराजी दाखवली ती चांगली गोष्टी, पण त्यावर कारवाई काय होणार?”, असा सवाल सुप्रिया सुळे यांनी केला.