अंजूरफाटामार्गे वाडा, गुजरात अथवा नाशिककडे जाणाऱ्या सर्व प्रकारच्या अवजड वाहनांना अंजूरफाटा येथे कायमस्वरूपी प्रवेश बंद करण्यात आला आहे. या वाहनांनाही पर्यायी मार्ग देण्यात आला असून, ही वाहने अंजूरफाटा येथून मानकोलीमार्गे मुंबई-नाशिक मार्गाने इच्छित ठिकाणी जातील. वाडा, गुजरातकडे जाणारी वाहने वडपे-चाविंद्रा-वंजारपट्टी उड्डाणपूलमार्गे जातील.

तळवली नाक्याकडून भिवंडी शहरात येणाऱ्या सर्व प्रकारच्या अवजड वाहनांनाही कायमस्वरूपी प्रवेश बंद करण्यात आला आहे. ही वाहने तळवली नाक्याकडून खोणी गाव, पारोळ फाटा, वंजारपट्टी उड्डाणपुलावरून चाविंद्रामार्गे नाशिक महामार्गाने इच्छित ठिकाणी जातील. पुढील आदेशापर्यंत या अधिसूचनेची अंमलबजावणी केली जाणार आहे. या अधिसूचनेचा भंग केल्यास वाहनचालकांवर कारवाई करण्याचा इशारा देण्यात आला आहे. तर, अग्निशमन दल, पोलिसांची वाहने, रुग्णवाहिका आणि अन्य अत्यावश्यक सेवेतील वाहनांना ही अधिसूचना लागू राहणार नाही.