मुंबई: विधानपरिषद आमदार आणि ठाकरेंचे निकटवर्तीय अशी ओळख असलेल्या सचिन अहिर यांनी काल उपमुख्यमंत्री एकनाथ शिंदे यांच्या शिवसेनेत प्रवेश केला. शिवसेना उद्धव बाळासाहेब ठाकरे पक्षाचे नेते आणि आमदार आदित्य ठाकरे यांच्यासोबत सातत्याने दिसणाऱ्या सचिन अहिर यांनी अचानक ठाकरेंची साथ सोडल्याने आश्चर्य व्यक्त केलं जात आहे. आदित्य ठाकरे ज्या वरळी विधानसभा मतदारसंघाचं नेतृत्व करतात त्याच वरळीतून याआधी अहिर हे निवडून आलेले आहेत. त्यामुळे आगामी विधानसभा निवडणुकीतही आदित्य यांच्यासमोर आव्हान निर्माण होण्याची शक्यता आहे. अशातच वरळीचे माजी आमदार आणि विधानपरिषदेतील ठाकरेंच्या शिवसेनेचे विद्यमान आमदार सुनील शिंदे हेदेखील वेगळ्या विचारात असल्याची चर्चा रंगू लागली आहे. या पार्श्वभूमीवर सुनील शिंदे यांनी खुलासा केला असून माझ्याविषयी जाणूनपूर्वक खोट्या बातम्या पसरवल्या जात असल्याचं म्हटलं आहे.
पक्षांतराविषयी सुरू असलेल्या चर्चांवर स्पष्टीकरण देताना सुनील शिंदे यांनी म्हटलं आहे की, “स्वतःच्या स्वार्थी राजकारणासाठी काल एक पक्षप्रवेश झाला. या प्रवेशानंतर संपूर्ण महाराष्ट्रात, विशेषतः मुंबई व वरळीतील मतदार, नागरिक आणि निष्ठावंत शिवसैनिकांमध्ये संतापाची तीव्र लाट उसळली आहे. मागील सात वर्षांत पक्षप्रमुख उद्धव ठाकरे यांनी विधानपरिषद आमदारकीसह पक्षातील अनेक महत्त्वाची पदे व सन्मानाची जबाबदारी दिल्यानंतरही केवळ स्वार्थासाठी केलेल्या या गद्दारीचा समाजमाध्यमांवरही सर्व स्तरांतून तीव्र शब्दांत निषेध होत आहे. या सर्व घडामोडींमुळे आत्मविश्वास गमावलेल्या आणि पायाखालची वाळू सरकलेल्या काही लोकांकडून माझी राजकीय बदनामी करण्याचा तसेच शिवसैनिक आणि नागरिकांमध्ये संभ्रम निर्माण करण्याचा केविलवाणा प्रयत्न सुरू आहे. त्याचाच भाग म्हणून माझ्याबाबत जाणीवपूर्वक खोट्या आणि बिनबुडाच्या बातम्या माध्यमांमध्ये पेरल्या जात आहेत. या सर्वामागील सूत्रधार कोण आहेत, हे महाराष्ट्रातील जनतेला आणि शिवसैनिकांना ठाऊक आहे. माध्यमांमध्ये प्रसारित होत असलेल्या या अफवांमध्ये आणि बातम्यांमध्ये कोणतेही तथ्य नाही,” अशा शब्दांत सुनील शिंदे यांनी त्यांच्याबाबत होत असलेल्या चर्चा फेटाळून लावल्या आहेत.
“मी कालही शिवसेनेसोबत होतो, आजही शिवसेनेसोबतच ठाम उभा आहे आणि उद्याही राहणार आहे. वंदनीय शिवसेनाप्रमुखांच्या आशीर्वादाने आणि पक्षप्रमुखांच्या आदेशाने, तसंच निष्ठावंत शिवसैनिकांच्या बळावर मुंबईकर आणि वरळीकरांच्या सेवेसाठी अखंडपणे कार्यरत राहणार आहे,” असा विश्वासही सुनील शिंदे यांनी व्यक्त केला आहे.
दरम्यान, सुनील शिंदे यांनी जरी आपण ठामपणे ठाकरेंच्या पाठीशी उभे राहणार असल्याचे जाहीर केले असले तरी आगामी विधानसभा निवडणूक आदित्य ठाकरे यांच्यासाठी सोपी ठरणार नाही. कारण २०१९ मध्ये वरळी विधानसभा मतदारसंघातून निवडणूक लढवण्याचं निश्चित केल्यानंतर आदित्य ठाकरे यांनी तेव्हा राष्ट्रवादीत असलेल्या सचिन अहिर यांना आपल्या पक्षात आणून विधानपरिषदेत आमदार केलं, तर तेव्हा विधानसभेत वरळीचं प्रतिनिधित्व करणाऱ्या सुनील शिंदे या पक्षातील शिलेदारालाही विधानपरिषदेत संधी दिली. त्यानंतर २०१९ च्या विधानसभा निवडणुकीत आदित्य ठाकरेंच्या विजयाचा मार्ग सुकर झाला होता. मात्र २०२४ मध्ये झालेल्या विधानसभा निवडणुकीत जवळपास ८ हजारांच्या काठावरील मताधिक्याने ते वरळीतून निवडून आले होते. अशातच सचिन अहिर यांनी त्यांची साथ सोडल्याने या मतदारसंघात त्यांना २०२९ मध्ये विजयाची समीकरणे जुळवून आणण्यासाठी तारेवरची कसरत करावी लागण्याची शक्यता आहे.