Mumbai Rain Red Alert By IMD: मुंबईत गेल्या दोन दिवसांपासून मुसळधार पाऊस सुरु आहे. सोमवारी झालेल्या सततच्या पावसानंतर आता मंगळवारीही जोरदार पाऊस कोसळतो आहे. त्यामुळे सखल भागात पाणी साचलं असून जनजीवन विस्कळीत झालं आहे.
मुंबई: मुंबईत सोमवारी झालेल्या मुसळधार पावसानंतर मंगळवारची सकाळही पावसासोबतच झाली. सध्या शहर आणि उपनगरात जोरदार पाऊस कोसळतो आहे. त्यामुळे वाहतूक, शिक्षण आणि दैनंदिन जीवन विस्कळीत झाले आहे. भारतीय हवामान विभागाने (IMD) मुंबई, रायगड, रत्नागिरी, सातारा, कोल्हापूर आणि पुणे यासह महाराष्ट्रातील अनेक जिल्ह्यांसाठी पावसाचा रेड अलर्ट जारी केला आहे.
हवामान विभागाने दिलेल्या अलर्टनुसार, येत्या तीन ते चार तासात मुंबईत अतिवृष्टीची शक्यता आहे. यादरम्यान मुसळधार पाऊस कोसळेल. मुंबईत सोमवारपासून विनाखंड पाऊस होतो आहे. अंधेरी, जोगेश्वरी, गोरेगाव, मालाड, कांदिवली, बोरिवली, दहिसर,विलेपार्ले, वांद्रे येथेही जोरदार पाऊस बरसतो आहे. त्यामुळे प्रशासन अलर्ट मोडवर आहे.
Maharashtra Rain: राज्यात पावसाचे सात बळी! मुंबईत दाणादाण, मराठवाड्यात 11 जण बेपत्ता, NDRF तैनात
मुसळधार पावसामुळे मुंबईतील भायखळा, सायनच्या गांधी मार्केट, दादर, अंधेरी आणि विलेपार्ले यासह अनेक सखल भाग गुडघ्यापर्यंत पाणी भरलं आहे. शहरातील विविध ठिकाणी रस्ते जलमय झालेले दिसत आहेत. मुसळधार पावसामुळे अंधेरी सबवे वाहतुकीसाठी बंद करण्यात आला होता.
जागोजागी साचलेलं पाणी आणि पूरसदृश परिस्थिती लक्षात घेता, बीएमसीने मंगळवारी सर्व शाळा आणि महाविद्यालयांना सुट्टी जाहीर केली आहे. राज्य अधिकाऱ्यांनी कार्यालयांना कर्मचाऱ्यांना लवकर सोडण्याचा सल्ला दिला आहे, तर नागरिकांना अत्यंत आवश्यक नसल्यास घराबाहेर न पडण्याचं आवाहन करण्यात आलं आहे.
सततच्या पावसामुळे लोकल सेवेवरही परिणाम झाला आहे. मध्य रेल्वेची वाहतूक 20 ते 25 मिनिटे उशिराने सुरु आहे, तर हार्बर रेल्वेही 15 मिनिटे उशिराने धावत आहे. तसेच,पश्चिम रेल्वे 10 मिनिटे उशिराने सुरु आहेत.
सोमवारी रात्री 8:30 ते मंगळवारी पहाटे 5:30 या वेळेत शहरात मोठ्या प्रमाणात पाऊस झाल्याची नोंद करण्यात आली आहे. विक्रोळीमध्ये सर्वाधिक 194.5 मिमी, त्यानंतर सांताक्रूझ – 185 मिमी, जुहू – 176.5 मिमी, भायखळा – 167 मिमी, वांद्रे – 157 मिमी, कुलाबा – 79.8 मिमी आणि महालक्ष्मी 71.9 मिमी इतकी नोंद झाली आहे. महाराष्ट्राचे मुख्यमंत्री देवेंद्र फडणवीस यांनी सांगितलं की, एकट्या मुंबईत फक्त आठ तासांत 170 मिमी पाऊस पडला आहे.
या पार्श्वभूमीवर, बृहन्मुंबई महानगरपालिका क्षेत्रातील अत्यावश्यक सेवा वगळता, इतर सर्व शासकीय, निमशासकीय कार्यालये तसेच बृहन्मुंबई महानगरपालिका कार्यालये यांना जिल्हा आपत्ती व्यवस्थापन प्राधिकरण या नात्याने महानगरपालिकेकडून आज सुटी जाहीर करण्यात येत आहे.
तसेच, मुंबई महानगरातील सर्व खासगी कार्यालये, आस्थापना यांनी आपल्या कामकाजाच्या स्वरूपानुसार, कर्मचाऱ्यांना घरी राहून कामकाज (वर्क फ्रॉम होम) करण्याच्या आणि अनावश्यक प्रवास टाळण्याच्या सूचना तातडीने द्याव्यात, असे बृहन्मुंबई महानगरपालिकेतर्फे आवाहन करण्यात येत आहे.