भुजबळ म्हणाले, की पालकमंत्री कुणालाही होऊ द्या; पण मला असे वाटते, की जसे रायगडमध्ये आमची एकच जागा आहे, तिथे आम्ही पालकमंत्रिपदाचा आग्रह धरतो. मी आमच्या लोकांना सांगेन, सर्वांत जास्त सात आमदार नाशिकमध्ये आहेत. त्यासाठीही तेवढाच आग्रह धरावा. पालकमंत्री कोण होणार, हा महत्त्वाचा मुद्दा नाही. सात आमदार एकाच पक्षाचे असतील, तर त्या पक्षाला पालकमंत्रिपद मिळायला पाहिजे, असे मला वाटते. माझे म्हणणे मी अजित पवार आणि सुनील तटकरे यांच्याकडे मांडेन, असे भुजबळ यांनी स्पष्ट केले.

‘तो निर्णय मुख्यमंत्र्यांचा’- गिरीश महाजन
पालकमंत्रिपदावर बोलताना गिरीश महाजन म्हणाले, की मुख्यमंत्री व दोन्ही उपमुख्यमंत्री जो निर्णय घेतील, तो सर्वांना बंधनकारक असेल. पालकमंत्रिपदासाठी आपण कोणत्याही प्रकारे आंदोलन केले नाही, की पोस्टर जाळलेले नाहीत, असा टोलाही त्यांनी रायगडातील वादावरून लगावला.‘आयटी हब’साठी पायाभूत सुविधा
आयटी हब नसल्याने जळगाव जिल्ह्यातील युवकांना पुणे-मुंबईसारख्या ठिकाणी जावे लागते. त्यामुळे ‘आयटी हब’ निर्माण व्हावे यासाठी जिल्ह्यासह जळगाव शहरात पायाभूत सुविधा मजबूत करण्यावर भर दिला जाणार असल्याची ग्वाही उपमुख्यमंत्री अजित पवार यांनी रविवारी जळगावात बोलताना दिली. यावेळी लोकसंघर्ष मोर्चाच्या अध्यक्षा प्रतिभा शिंदे यांनी हजारो समर्थकांसह राष्ट्रवादी अजित पवार गटात प्रवेश केला. जळगावातील शिवतीर्थ मैदानावर ‘समृद्ध खान्देश संकल्प’ मेळाव्याचे आयोजन करण्यात आले होते. शहरात उद्योजकांना येणे-जाणे सुरळीत व्हावे यासाठी विमानतळाची धावपट्टी वाढविण्याचे काम सुरू होणार आहे.