शनिवार दुपारच्या सुमारास सिरोंचा तालुक्यातील अंकिसा मार्गावर ही घटना घडली. यात ८ वर्षीय शौर्य संतोष कोकू याचा नाहक बळी गेला आहे. वडील संतोष रामलू कोकू (वय ४३ वर्षे) व आई सौंदर्या कोकू (वय ३८ वर्षे) या जखमींवर उपचार सुरू आहेत. या घटनेने रक्षाबंधनासारख्या आनंददायी सणाच्या पार्श्वभूमीवर कोकू कुटूंबियांवर शोककळा पसरली आहे.
चिमुकल्या आयुषचा चटका लावणारा अंत; मृत भावाच्या हातावर बहिणीनं बांधली अखेरची राखी; गाव हेलावला
वृत्तानुसार, असरअल्ली येथील कोक्कू कुटुंब आपल्या नातेवाईकांकडे राखी बांधण्यासाठी दुचाकीने सिरोंचाच्या दिशेने निघाले होते. मात्र अंकिसा गावाजवळ पोहोचताच रस्त्यावर निष्काळजीपणे उभी ठेवलेल्या रामकृष्ण चिरला यांच्या मालकीच्या ट्रॅक्टर-ट्रॉलीला त्यांच्या दुचाकीची भीषण धडक बसली. अरुंद मार्ग, उभी केलेली ट्रॉली आणि वेळीच दिसून न आल्याने ही घटना घडली.

धडकेचा जोर इतका भीषण होता की, यात शौर्यचा जागीच मृत्यू झाला आहे. संतोष कोकू यांचे हात, पाय मोडले व गंभीर दुखापत झाली आहे. आई सौंदर्या कोकू किरकोळ जखमी झाल्या आहेत. त्यांना सिरोंचा येथील प्राथमिक आरोग्य केंद्रात उपचारार्थ हलविण्यात आले. मात्र संतोष कोकू यांची प्रकृती गंभीर असल्याने त्यांना तातडीने तेलंगणातील वरंगल येथील खाजगी रुग्णालयात हलविण्यात आले. पोलिसांनी घटनास्थळी धाव घेतली, पंचनामा करून अपघाताची नोंद केली असून, पुढील तपास सुरु आहे.

रक्षाबंधनाच्या दिवशीच कोकू कुटुंबावर दु:खाचा डोंगर कोसळल्याने हळहळ व्यक्त होत आहे. घटनेनंतर गावकऱ्यांनी संताप व्यक्त केला असून रस्त्यावरील अतिक्रमण व निष्काळजीपणे वाहने उभी केली जात असल्याचे अपघाताचे सत्र सुरु असल्याचा आरोप होत आहे. त्यामुळे अशा वाहन मालकांवर कठोर कारवाईची मागणी परिसरातील जनतेने केली आहे.