आम्ही मतदान केलं पण आमदार गायब झाले
महिलांच्या आर्थिक स्वातंत्र्यासाठी, त्यांच्या आरोग्य, पोषणामध्ये सुधारणा करणे तसेच कुटुंबातील त्यांची निर्णायक भूमिका मजबूत करण्यासाठी मुख्यमंत्री लाडकी बहीण योजना सुरू करण्यात आली. विधानसभा निवडणुकीच्या पूर्वी राज्य शासनाने सुरू केलेली लाडकी बहीण योजना चांगलीच चर्चेत आली. मध्यप्रदेशात यशस्वी ठरलेली ही योजना महाराष्ट्रात राबविण्याचा निर्णय घेण्यात आला. या योजनेच्या भरवश्यावरच महायुतीला स्पष्ट बहुमत मिळाले. लाडक्या बहिणींचा आशीर्वाद पाठीशी असल्याच्या प्रतिक्रियाही अनेक नेत्यांनी दिल्या. लाडक्या बहीण योजनेमुळे इतर विभागांचा निधी मिळण्यात विलंब होत असल्याच्या तक्रारी आता वाढू लागल्या आहेत. आमदारांना ५ कोटी रुपयांपैकी किमान २५ ते ३० टक्के विकासनिधी राज्य शासनाकडून प्राप्त होणे अपेक्षित होते. मात्र यावर्षी प्रथमच एकही रुपया प्राप्त न झाल्याने विकासकामे रखडली आहेत. ऐन पावसाळ्यात नागरिकांना विविध समस्यांना सामोरे जावे लागत आहे. आम्ही मतदान केले मात्र आता आमदार गायब झाले, अशा शब्दांत नागरिकांची ओरड सुरू असल्याची खंत नागपूर जिल्ह्यातील आमदारांनी व्यक्त केली.

लाडक्या मतदारांना काय उत्तर देऊ?
काँग्रेसच्या आमदारांनी तीव्र नाराजी व्यक्त केली. ‘राज्य सरकारने लाडकी बहीण योजनेसाठी मोठ्या प्रमाणावर निधी वळता केला आहे. त्यामुळे आमदार निधी अडवला गेला आहे,’ असा आरोप कॉंग्रेसचे उत्तर नागपुरातील आमदार नितीन राऊत यांनी केला. पावसाळ्याच्या अनुषंगाने मुरूम, खडीकरणाची कामे करणे गरजेचे होते. रस्त्यांवरील डांबर उखडले आहे. नगरसेवकही नसल्याने लोकांची गर्दी आमदारांकडे वाढली आहे. यापूर्वी असे कधीच झाले नाही. विकासकामांच्या रखडलेल्या प्रलंबित प्रस्तावांमुळे अनेक भागांत लोकांच्या समस्या वाढत असून, लोकप्रतिनिधींना याचा सामना करावा लागत आहे. राज्य सरकारने तत्काळ निधी वितरित करावा, अशी मागणीही त्यांनी केली. हा आमदारांच्या हक्काचा निधी आहे. तो वेळेत आला नसल्याने विकास कामांना खिळ बसली, असे आमदार विकास ठाकरे आणि अभिजित वंजारी म्हणाले. कामे होत नसल्याने लाडक्या मतदारांचा रोष ओढवून घ्यावा लागत असल्याची भावना जिल्ह्यातील आमदारांनी व्यक्त केली.

लाडक्या बहिणींची संख्या
तालुका : लाडक्या बहिणी
नागपूर शहर : १,९७,६०५
कामठी : ३२,२२१
मौदा : २४,२८९
पारशिवणी : १८,७४०
रामटेक : १७,७२०
सावनेर : ३०,७४६
नागपूर ग्रामीण : ५५,४४२
हिंगणा : २९,६२२
भिवापूर : १३,०९८
कुही : १८,३०८
उमरेड : १८,९५६
नरखेड : २३,०७९
काटोल : २१,१९०
कळमेश्वर : १८,२५१
——————————–
एकूण : ५,१९,२६७