आंदोलकांना पोलिसांनी ताब्यात घेतलं आहे. कार्यक्रम संपल्यानंतर पोलीस आंदोलकांना घेऊन जात असताना त्यांनी माध्यमांना प्रतिक्रिया दिली. “मुख्यमंत्र्यांनी आंदोलनाची दखल घेतली आहे. त्यांनी सांगितलं आहे की, तुम्ही तुमचं म्हणणं मांडलं आहे. आमची अपेक्षा आहे की, त्यांनी योग्य ती कारवाई करावी”, अशी प्रतिक्रिया आंदोलकांनी दिली.

“इतिहासाचं विकृतीकरण केलं जात आहे. रायगडावर मशीद नसताना तिथे मशीद आहे, असं सांगितलं जातंय. ते थांबवलं जावं”, असं म्हणत आंदोलकांनी आपलं म्हणणं माडलं आहे. “खालिद का शिवाजी या चित्रपटात तीन चुकीच्या गोष्टी दाखवल्याचा दावा आंदोलकांनी केला आहे. शिवाजी महाराजांच्या सैन्यात 35 टक्के मुस्लिम समाजाचे सैन्य होते, असा दावा चित्रपटात करण्यात आला आहे”, असं आंदोलकांनी म्हटलं आहे.

दरम्यान, घोषणाबाजी करणारे आंदोलक हे केवळ दोन जण होते. त्यांचा कोणत्या संघटनेशी संबंध आहे का? किंवा ते कोणत्या संघटनेचे होते? याबाबतची माहिती अद्याप समजू शकलेली नाही. पण ते सोबत एक बॅनर घेऊन आले होते. तसेच त्यांच्या हातात निदर्शने करण्यासाठी पोस्टरदेखील होते. पोलिसांनी त्यांना ताब्यात घेतलं आहे. त्यामुळे पोलीस तपासातून आंदोलक नेमकं कोण होते? याबाबत सविस्तर माहिती समोर येऊ शकते.

‘खालिद का शिवाजी’ चित्रपटात काय आहे?

‘खालिद का शिवाजी’ या चित्रपटात चुकीचा इतिहास दाखवण्यात आल्याचा आरोप करण्यात आला आहे. पण या चित्रपटात एका मुस्लिम बालकाची कहाणी आहे. तो मराठी जिल्हा परिषद शाळेत शिक्षणाला जातो तेव्हा त्याला कोणकोणत्या गोष्टींना सामोरं जावं लागतं, त्यातून त्याला काय-काय प्रश्न पडतात आणि तो आपल्या आजीला त्याबाबत प्रश्न विचारत आपल्या शंकांचं निरसन करुन घेताना चित्रपटाच्या ट्रेलरमध्ये बघायला मिळालं आहे. या चित्रपटात छत्रपती शिवाजी महाराजांच्या इतिहासाबाबत मोडतोड करण्यात आल्याचा आरोप करण्यात आला आहे. त्यामुळे या चित्रपटाला विरोध होताना दिसत आहे.