यशराज तुकाराम गांगुर्डे (वय १६) असे मृत विद्यार्थ्याचे नाव असून, पोलिसांनी दोन सोळावर्षीय मुलांना या खूनप्रकरणी ताब्यात घेतले आहे. सातपूर पोलिसांच्या माहितीनुसार, यशराजचा मोठा भाऊ पारस गांगुर्डे (वय २१, रा. समर्थ रो-हाउस, विश्वासनगर) याने दिलेल्या फिर्यादीनुसार दोन सोळावर्षीय विधिसंघर्षित मुलांविरुद्ध खुनाचा गुन्हा नोंद झाला आहे. त्यापैकी एकजण शिवाजीनगर, तर दुसरा महादेवनगरातील रहिवासी आहे. यशराजचे वडील स्कूल व्हॅन चालवायचे. परंतु, करोना काळात कर्ज थकल्याने त्यांनी गळफास घेत तीन वर्षांपूर्वी आत्महत्या केल्याचे समजते. यशराजचा भाऊ पारस हा स्कूल व्हॅन चालवून कुटुंबाचा उदरनिर्वाह करीत आहे.
मुख्यमंत्री फडणवीसांची मोठी घोषणा; आता मत्स्य व्यावसायिकांनाही मिळणार शेतकऱ्यांप्रमाणे कर्ज, कसा होणार फायदा?
दोन संशयितांपैकी एकाचे वडील रंगकाम करीत असून, आई भाजीविक्रीचा व्यवसाय करते. दुसऱ्या संशयिताचे वडील एका खासगी कंपनीत कंत्राटी कर्मचारी असून, आई हातगाडी लावून मसाल्याची विक्री करते. शनिवारी (दि. २) रात्री यशराजचा मृत्यू झाल्यानंतर रविवारी (दि. ३) सकाळी शवविच्छेदन करण्यात आले. त्यानंतर मृतदेह ताब्यात घेण्यावरून तणाव निर्माण झाला होता. पोलिसांनी क्लासमधील सीसीटीव्ही तपासून दोन संशयितांना ताब्यात घेतल्याचे सांगितल्यानंतर नातलगांनी यशराजचा मृतदेह ताब्यात घेतला. सकाळी साडेअकराच्या सुमारास यशराजच्या घरी मृतदेह आणल्यानंतर परिसरातील नागरिकांनी गर्दी केली होती.

नेमके काय घडले?
शनिवारी (दि. २) सायंकाळी साडेसहा वाजता यशराज राहत्या घराकडून क्लासकडे पायी निघाला होता. पावणेआठ वाजता पारसला त्याची आई आशा यांचा फोन आला. ‘यश बेशुद्ध पडला असून, त्याला सिव्हिल हॉस्पिटलमध्ये नेले आहे. तू लवकर इकडे ये,’ असे त्या म्हणाल्या. रुग्णालयात पोहोचल्यावर पोलिस, वैद्यकीय अधिकाऱ्यांनी यशराजच्या मृत्यूबाबत त्याला सांगितले.

दरम्यान, यशराजच्या क्लासमधील दोघांकडे पारसने विचारणा केली. त्यावेळी संशयित व यशराजमध्ये गुरुवारी (दि. ३१) रात्री आठ वाजता बेंच पुढे घेण्यावरून वाद झाला होता. त्यांनी यशराजला शिवीगाळ करून चापटीने मारहाण केली होती. त्यानंतर शनिवारी (दि. २) यशराज सायंकाळी पावणेसात वाजता क्लासबाहेर उभा असताना संशयितांनी त्याला जिवे मारण्याच्या उद्देशाने पुन्हा शिवीगाळ करून लाथाबुक्क्यांनी मारहाण केली. त्यात यशराजच्या छातीवर, बरगड्यांवर मार लागल्याने त्याचा मृत्यू झाला, असे फिर्यादीत नमूद आहे. अंतर्गत रक्तस्त्राव आणि जखमांमुळे यशराजचा मृत्यू झाल्याचे शवविच्छेदन अहवालात नमूद करण्यात आलेले आहे.

सायंकाळी सात ते रात्री नऊ या वेळेत दहावीचा क्लास असतो. विद्यार्थी क्लासमध्ये येण्यापूर्वी त्यांच्यात वाद झाला. त्यात यशराज बेशुद्ध झाल्याचे कळताच आम्ही रुग्णालयात दाखल केले. त्याच्या दुर्दैवी मृत्युमुळे आम्हीदेखील शोकमग्न आहोत. – कारभारी म्हस्के, संचालक, खासगी क्लास

खासगी क्लासबाहेर दोन विद्यार्थ्यांनी मारहाण केल्याने अंतर्गत रक्तस्त्राव व जखमांमुळे एका विद्यार्थ्याचा मृत्यू झाला. विद्यार्थ्यांच्या शिस्तीबाबतचा मुद्दा त्यामुळे समोर येत आहे. पालकांनीही विद्यार्थ्यांच्या हालचालींवर लक्ष ठेवायला हवे. शालेय प्रशासन व खासगी क्लासेसमध्ये विद्यार्थ्यांना संयमाची शिकवण देतानाच गंभीर कृत्यामुळे होणाऱ्या दुष्परिणामांचीही जाणीव करून द्यायला हवी. – रणजित नलवडे, वरिष्ठ पोलिस निरीक्षक, सातपूर