New Chief of Western Naval Command: नौदलाच्या पश्चिम कमांडच्या प्रमुखपदी व्हाइस ॲडमिरल कृष्णा स्वामिनाथन यांची नियुक्ती झाली आहे. त्यांनी व्हाइस ॲडमिरल संजय जसजित सिंह यांच्याकडून पदभार स्वीकारला. ‘आयएनएस शिक्रा’ तळावर संचालन झाले. स्वामिनाथन यांना युद्धनौकांचा मोठा अनुभव आहे. यापूर्वी त्यांनी अनेक महत्त्वाच्या पदांवर काम केले आहे.
मुंबईत मुख्यालय असलेली पश्चिम कमांड नौदलात व एकूणच देशाच्या संरक्षणासाठी सामरिकदृष्ट्या महत्त्वाची आहे. १९७१ च्या युद्धातील चमकदार कामगिरीपासून ते कारगिल युद्ध व अलिकडेच ‘ऑपरेशन सिंदूर’ यामध्येही पश्चिम कमांडमधील युद्धनौकांनी मोलाची भूमिका बजावली. त्यामुळेच या कमांडचे प्रमुखपद ही महत्त्वाची जबाबदारी असते. हा पदभार स्वीकारलेल्या व्हाइस ॲडमिरल स्वामिनाथन यांना युद्धनौकांच्या सारथ्याचा दीर्घ अनुभव आहे.
भारताचा मित्रांसह जगातील सर्वात मोठा लष्करी सराव, 19 देश, 35000 सैनिक; चीनची जहाजातून हेरगिरी
जुलै १९८७ मध्ये नौदलात रुजू झालेल्या व्हाइस ॲडमिरल स्वामिनाथन यांचा नौदलातील बहुतांश कालावधी पश्चिम कमांड व कमांडशी संलग्न युद्धनौका ंवर गेला आहे. त्यांनी जलद हल्ल्याच्या क्षेपणास्त्र युद्धनौका आयएनएस विद्युत, आयएनएस विनाश व आयएनएस कुलीश यांसह आयएनएस म्हैसूर ही विनाशिका व आयएनएस विक्रमादित्य या विमानवाहू युद्धनौकांचे कमांडिंग अधिकारी म्हणून सेवा बजावली आहे. त्यांना कमांडचादेखील सक्षम अनुभव आहे.
तारांकित अधिकारी म्हणून रिअर ॲडमिरलपदी बढती मिळाल्यानंतर त्यांनी दक्षिण नौदल कमांडचे प्रशिक्षण प्रमुख, पश्चिम युद्धनौकांचे ताफा प्रमुख व पश्चिम कमांडचे चीफ ऑफ स्टाफ म्हणून सेवा बजावली आहे. कमांडची धुरा सांभाळण्यापूर्वी ते नौदल मुख्यालयात उप नौदल प्रमुख म्हणून कार्यरत होते. त्यांना विशिष्ट सेवा व अति विशिष्ट सेवा पदकाने सन्मानित करण्यात आले आहे.
भारतीय सैन्यदलाला बळ; 1.05 लाख कोटींची शस्त्रास्त्र खरेदी, दहा प्रस्तावांना डीएसीची मान्यता
इलेक्ट्रॉनिक्स युद्धकुशल
इलेक्ट्रॉनिक्स युद्धपद्धतीत कुशल असलेले अॅडमिरल स्वामिनाथन यांनी कोची विद्यापीठातून विज्ञान व तंत्रज्ञान विषयात स्नातकोत्तर विज्ञान (एमएस्सी), लंडनच्या किंग्स कॉलेजमधून संरक्षण अभ्यास विषयात एमए, मुंबई विद्यापीठातून सामरिक अभ्यासात एमफिल व आंतरराष्ट्रीय अभ्यासात मुंबई विद्यापीठातून डॉक्टरेट मिळवली आहे.