वार्षिक सव्वा दोन कोटी कंटेनर हाताळणी क्षमतेचे वाढवण बंदर २०३६ पर्यंत पूर्ण रूपात उभे राहणार आहे. बंदराचा पहिला टप्पा २०२८-२९ पर्यंत कार्यान्वित होणार आहे. या बंदरावर दररोज सरासरी सहा ते आठ हजार मालवाहू वाहनांची ये-जा होण्याचा अंदाज आहे. इतक्या मोठ्या संख्येने येणाऱ्या वाहनांसाठी ‘एनएचएआय’कडून ३२.२८ किमी लांबीचा स्वतंत्र महामार्ग बांधण्यात येणार आहे. या महामार्गासाठी स्थानिकांनी ४१३ हेक्टर जमीन दिली आहे. त्याच स्थानिकांसाठी आता त्या ठिकाणी स्वतंत्र सेवा रस्तादेखील बांधला जाणार आहे.

Vasai News : मॅडम…ओ मॅडम! ऑनलाइन गेमच्या नादापायी मुलाने आईचा जीव घेतला, बापाने पुरावा नष्ट केला, पण मोलकरणीने भांडाफोड केला
वाढवण पोर्ट प्रायव्हेट लिमिटेडच्या (व्हीपीपीएल) संचालक मंडळाच्या बैठकीत यासंदर्भात चर्चा होऊन मंजुरी देण्यात आली. व्हीपीपीएल ही जेएनपीएची उपकंपनी आहे. स्थानिकांनी वाढवण बंदराच्या महामार्गासाठी जमीन दिल्याने, उत्तरदायित्व म्हणून हा सेवा रस्ता बांधण्याचा निर्णय संचालक मंडळाने घेतला आहे. हा सेवा रस्ता १७.५० किमी लांबीचा असून त्यासाठी ३५२ कोटी रुपये खर्च केले जाणार आहेत. कंत्राट दिल्यानंतर सहा ते आठ महिन्यात तो बांधून पूर्ण होईल, अशी माहिती व्हीपीपीएलने दिली.

राष्ट्रीय महामार्गाच्या संरेखनानुसार बांधणी

वाढवण बंदराच्या संलग्नतेसाठी ‘एनएचएआय’तर्फे वाढवणपासून तीन किमी अंतरावरील वरोर ते राष्ट्रीय महामार्ग ४८वरील (अहमदाबाद महामार्ग) तवा जंक्शनपर्यंत विशेष महामार्ग उभारला जाणार आहे. हा महामार्ग पश्चिम रेल्वे समर्पित मालवाहतूक मार्ग (डीएफसी), बुलेट ट्रेन, बांधकामाधीन वडोदरा-मुंबई द्रुतगती मार्ग यांनादेखील जोडला जाणार आहे. मात्र हा महामार्ग केवळ माहवाहू वाहनांसाठीच असेल आणि तो प्रवेश नियंत्रित, टोल असलेला मार्ग असल्याने स्थानिकांसाठी उपयुक्त नसेल. त्यामुळे स्थानिकांसाठी वाढवण बंदर तसेच मुख्य महामार्गांशी जोडण्यासाठी हा टोलमुक्त दुपदरी सेवा रस्ता बांधला जाणार आहे, अशी माहिती व्हीपीपीएलने दिली.