२०१७ मध्ये भाजपनं मुंबई महापालिकेची निवडणूक स्वबळावर लढवली. त्यावेळी भाजप च्या जागा ८२ वर पोहोचल्या. त्याआधी २०१२ मध्ये भाजपनं शिवसेनेसोबत युतीत लढताना ३१ जागा जिंकल्या होत्या. २०१४ मध्ये राज्याची सत्ता मिळाल्यावर भाजपनं मुंबईत चांगलाच जम बसवला आहे. मुंबई महापालिकेची निवडणूक अवघ्या काही महिन्यांवर आलेली असताना भाजप संघटनात्मक बदल करण्याच्या तयारीत आहे.
राजीनाम्यावरुन अजितदादा संभ्रमात; आता कोकाटेंना ‘डिपार्टमेंट’च वाचवणार? NCPचं शिंदेंकडे बोट
मुंबई भाजपची धुरा सध्या आशिष शेलारांकडे आहे. शेलार मामांच्या नेतृत्त्वात भाजपनं २०१७ मध्ये शिवसेनेसमोर कडवं आव्हान दिलं. तेव्हा शिवसेना एकसंध होती. स्वबळावर लढताना शिवसेनेनं ८४ जागा जिंकल्या. तर भाजपनं ८२ जागांपर्यंत मजल मारली. शिवसेना आणि भाजपला जवळपास सारख्याच जागा मिळाल्या. पण राज्यात दोन्ही पक्ष सत्तेत असल्यानं भाजपनं शिवसेनेला सत्ता स्थापनेची संधी दिली.

एक व्यक्ती एक पद असा भाजपचा नियम आहे. आशिष शेलार राज्याच्या मंत्रिमंडळात आहे. त्यामुळे आता मुंबई भाजच्या अध्यक्षपदी नवा चेहरा दिला जाणार आहे. वरिष्ठ नेत्या आणि माजी खासदार पूनम महाजन यांची मुंबई भाजपच्या अध्यक्षपदी वर्णी लागू शकते, असं वृत्त न्यूज१८ नं दिलं आहे. पूनम महाजन यांच्यासोबतच आमदार अमित साटम आणि प्रवीण दरेकर यांची नावंदेखील अध्यक्ष पदाच्या स्पर्धेत आहेत.

राज्यात भाजप रुजवण्यात मोठा वाटा असलेल्या पूनम महाजन पक्षात २००६ पासून सक्रिय आहेत. वयाच्या २६ व्या वर्षापासून त्या पक्षात कार्यरत आहेत. भारतीय जनता युवा मोर्चाच्या सचिव पदावर त्यांनी काम केलं आहे. २००९ मध्ये त्यांनी घाटकोपरमधून विधानसभा निवडणूक लढवली. पण मनसेच्या राम कदम यांनी त्यांचा पराभव केला. यानंतरही त्या पक्ष संघटनेत काम करत राहिल्या. २०१० मध्ये त्यांनी भारतीय जनता युवा मोर्चाच्या उपाध्यक्षपदी नियुक्ती झाली.

२०१४ च्या लोकसभा निवडणुकीपूर्वी महाजन यांची राष्ट्रीय सचिवपदी नेमणूक केली गेली. मुंबई उत्तर मध्य लोकसभा मतदारसंघातून त्यांना उमेदवारी देण्यात आली. काँग्रेसचा बालेकिल्ला असलेल्या मतदारसंघात त्यांनी काँग्रेसच्या विद्यमान खासदार प्रिया दत्त यांचा १.८६ लाख मतांनी पराभव केला. २०१९ मध्ये त्यांनी दत्त यांचा १.३० लाख मतांनी पराभव करत पुन्हा लोकसभा गाठली. २०२४ मध्ये पक्षानं त्यांचं तिकीट कापलं आणि उज्ज्वल निकम यांना संधी दिली. पण काँग्रेसच्या वर्षा गायकवाड यांनी त्यांचा पराभव करत लोकसभा गाठली.