मिळालेल्या माहितीनुसार, फराज सिद्दिकी हे दुपारी २ ते ३ दरम्यान आपल्या व्यावसायिक भागीदाराच्या ऑफिसमधून २५ लाख रुपयांची रोकड घेऊन बाहेर पडले. त्यानंतर त्यांना श्रीराम टॉवरमध्ये राहणाऱ्या एका मित्राला काही वेळ भेटायचे होते. मात्र टॉवरच्या पार्किंगमध्ये जागा न मिळाल्याने त्यांनी कार टॉवरच्या समोरच्या बाजूला रस्त्यालगत उभी केली आणि मित्राकडे गेले.

अर्ध्या ते एक तासाच्या कालावधीनंतर जेव्हा ते परत आले, तेव्हा त्यांनी पाहिले की त्यांच्या कारचा खिडकीचा काचा फोडलेल्या होत्या आणि कारमध्ये ठेवलेली रोकड भरलेली बॅग गायब होती. हे पाहून ते अत्यंत घाबरले आणि लगेचच सदर पोलीस ठाण्यात धाव घेत तक्रार दाखल केली.

तक्रारीनंतर सदर पोलीस घटनास्थळी दाखल झाले असून त्यांनी तपास सुरू केला आहे. पोलिसांच्या प्राथमिक तपासात ही चोरी पूर्वनियोजित असल्याचा संशय व्यक्त केला जात आहे. कारण आरोपींना नेमकी रक्कम कुठे आहे याची माहिती असल्याचे दिसून येते. त्यामुळे चोरट्यांनी फराज सिद्दिकी यांचा मागोवा घेतला असण्याची शक्यता वर्तवली जात आहे.

सदर परिसरातील सीसीटीव्ही फुटेज पोलिसांकडून तपासले जात असून, चोरटे कोणत्या वाहनातून आले, त्यांनी कुठल्या दिशेने पळ काढला, याचा शोध घेण्यात येत आहे. पोलिसांनी या घटनेची गांभीर्याने दखल घेतली असून, लवकरात लवकर आरोपींना पकडण्याचा विश्वास दिला आहे. ही घटना भरदिवसा शहरात घडल्यामुळे नागपूरकरांमध्ये भीतीचे वातावरण पसरले आहे. विशेषतः व्यवसायिक वर्गामध्ये असुरक्षिततेची भावना निर्माण झाली आहे.