मुंबईत सध्या रेल्वेचे जाळे मोठ्या प्रमाणात विस्तारले आहे. झटपट प्रवासासाठी मेट्रोसेवाही सुरू आहेत. मात्र मेट्रोसेवा या काही कार्यालय, मोठे रहिवासी परिसरांपासून दूर अंतरावर आहेत. त्यामुळे तिथपर्यंत पोहोचण्यासाठी काही वेळा वाहनांशिवाय पर्याय नसतो. तर अनेकांना मेट्रो स्थानकही गाठावे लागते. यामुळे तेथे पोहोचण्यासाठी बराच वेळ लागतो. काही वेळा वाहतूक कोंडीशीही सामना करावा लागतो.
Metro Line 9 च्या भाईंदर डेपोसाठी १२ हजार झाडं कापली जाणार, MMRDA ने पर्यावरणीय पाहणी केली नसल्याचा आरोप
हे पाहता या सेवांपर्यंत पोहोचण्यासाठी किंवा मेट्रोकडून व्यावसायिक आणि रहिवासी परिसरापर्यंत जाण्यासाठी भुयारी पादचारी मार्ग असावे यावर एमएमआरसीएल, एमएमआरडीए, मुंबई महापालिका नियोजन करत आहे. यासाठी प्रथम मेट्रो -३ आरे जेव्हीएलआर-बीकेसी- आचार्य अत्रे चौक (वरळी नाका)-कफ परेडला भुयारी पादचारी मार्गाची जोड देता येईल का यासाठी प्रयत्न होत आहे. धारावी, सांताक्रूझ, दादर, सिद्धिविनायक ही महत्त्वाची स्थानके जेव्हीएलआर-बीकेसी- आचार्य अत्रे चौक मार्गात येतात. यातील अखेरचा टप्पा कफ परेडपर्यंत असून त्याचे काम अंतिम टप्प्यात आहे.

याआधीच एक भुयारी पादचारी मार्गाचा प्रस्ताव अंतिम टप्प्यात आहे. यामध्ये महालक्ष्मी रेसकोर्सवर सेट्र्ल पार्क झाल्यानंतर मुंबईकरांसह पर्यटकांना सेंट्रल पार्कपर्यंत सहज पोहोचता यावे आणि पुन्हा मेट्रोपर्यंतही जाता यावे यासाठी महालक्ष्मी रेसकोर्स ते नेहरू सायन्स सेंटरपर्यंत भुयारी पादचारी मार्ग बांधण्यात येणार आहे. हा साधारण एक किमापेक्षा जास्त अंतराचा मार्ग असेल. मेट्रो ३ने उतरताच अनेक जण सेंट्रल पार्ककडे जाता येईल, असे नियोजन आहे.

या कामाचा विस्तार करत मेट्रो ३च्या अन्य स्थानकांनाही भूमिगत पादचारी मार्ग जोडण्यावर सोमवारी मुंबई महापालिका मुख्यालयात झालेल्या बैठकीत चर्चा करण्यात आली. बैठकीत मुंबई महापालिका आयुक्त भूषण गगराणी, एमएमआरसीएलच्या व्यवस्थापकीय संचालक अश्विनी भिडे (अतिरिक्त कार्यभार), नगर विकास विभागाचे अतिरिक्त मुख्य सचिव असीम गुप्ता यांच्यासह एमएमआरडीए आणि रेल्वेचे अधिकारी उपस्थित होते. मेट्रोला भुयारी पादचारी मार्ग कसे जोडता येतील, त्यासाठी लागणारा चटईक्षेत्र निर्देशांक यांसह अन्य मुद्द्यांवरही चर्चा करण्यात आली. याआधीही या योजनेवर दोनवेळा बैठकाही पार पडल्या आहेत.