वृत्तानुसार, अंबाजोगाईतील 20 वर्षीय विवाहिता अनम शेख हिच्याकडे घरखर्चासाठी माहेरहून पैसे आण, असा सतत तिच्याकडे तगादा लावण्यात आला. यासाठी तिला मारहाण व मानसिक छळ देखील केला. सततच्या जाचाला कंटाळून तिने गळफास घेतला आहे. याप्रकरणी अंबाजोगाई शहर पोलीस ठाण्यात पतीसह सासरच्या तिघांविरोधात गुन्हा दाखल झाला आहे.
Buldhana News : पेट्रोलिंग करायला गेले, पाण्यात काहीतरी हलताना दिसलं, पोलिसाने पाण्यात घेतली उडी, अन्… बुलढाण्यात काय घडलं?
याप्रकरणी अनमच्या सासरच्यांविरोधात तिचा भाऊ मुजफ्फर सिकंदर शेख याने तक्रार दाखल केली आहे. त्याने तक्रारीत म्हटले की, अनमचा 2023 मध्ये गांधीनगर येथील सोहेल अफसर शेख याच्याशी विवाह झाला होता. विवाहावेळी सासऱ्यांना मानपान, अनमला संसारोपयोगी वस्तू व अंगावर सोन्याचे दागिने देण्यात आले होते. पण एवढे असूनही त्यांनी तिच्याकडे पैशांसाठी तगादा लावला. सध्या तिला पाच महिन्यांचा एक मुलगाही आहे.

धक्कादायक म्हणजे, लग्नानंतर काही महिन्यांतच पती सोहेल शेख याला दारूचे व्यसन लागले होते. त्यानंतर त्याने व त्याच्या घरच्यांनी अनम हिचे दागिनेही मोडले आणि ते घरखर्चासाठी वापरले. ते पैसे देखील संपल्यावर माहेरून पैसे आण म्हणून अनमचा सतत मानसिक व शारीरिक छळ करण्यात आला. तिचे पती सोहेल, दिर मझहर शेख आणि जाव तन्नो शेख यांनी तिच्या चारित्र्यावर संशय देखील घेतला. यामुळे तिचा वारंवार छळ केला, असे तक्रारीत म्हटले आहे

अनमच्या आई-वडिलांनी मध्यस्थी करत काही वेळा पतीला पैसेही दिले. मात्र तरीही छळ सुरूच राहिला. २५ जुलैला सोहेल शेख याने तिच्या आईकडे ३० हजार रुपये वेल्डिंगच्या दुकानासाठी मागितले. पण ते पैसे न दिल्यामुळे तो संतप्त झाला होता.

त्यानंतर २६ जुलैच्या मध्यरात्री अनमच्या सासऱ्यांनी फोन करून सांगितले की अनमने विषारी औषध घेतले आहे. मात्र जेव्हा कुटुंबीय रुग्णालयात पोहोचले, तेव्हा डॉक्टरांनी सांगितले की तिने गळफास घेऊन आत्महत्या केली आहे.

सदर फिर्यादीवरून पती सोहेल शेख, दिर मझहर शेख व जाऊ तन्नो शेख यांच्याविरोधात गुन्हा दाखल झाला आहे. पोलिसांनी सोहेल शेखला ताब्यात घेतले असून पुढील तपास पीएसआय रवीकुमार पवार करत आहेत.