शनिवारी दुपारी साडेबारा वाजण्याच्या सुमारास विनती ऑरगॅनिक कंपनीमध्ये एक भीषण स्फोट झाला. या दुर्घटनेत लोटे जवळील घाणेकुंट येथील समीर खेडेकर या कामगाराचा मृत्यू झाला आहे. हा स्फोट नेमका कशामुळे झाला, हे अद्याप स्पष्ट झालेलं नाही. स्फोटानंतर परिसरात भीतीचं वातावरण आहे. ही दुर्घटनेची माहिती समजताच अग्निशमन दल आणि पोलीस घटनास्थळी दाखल झाले. अधिक तपास सुरू आहे. स्थानिक प्रशासनाकडून सुरक्षा उपाय आणि कारखान्यांतील सुरक्षाविषयक नियमांचं पालन होतंय का, याची चौकशी सुरू करण्यात आली आहे.

दरम्यान, लोटे एमआयडीसी परिसरात वारंवार घडत असलेल्या या घटनांमुळे परिसरात भीतीचे वातावरण आहे. त्यामुळे संबंधित कंपन्यांचे ऑडिट करण्यात यावे, यामध्ये कोणी दोषी आढळल्यास त्यांच्यावर कारवाई करावी, अशी मागणी परिसरातील नागरिकांकडून केली जात आहे. याआधीही याच लोटे एमआयडीसीत भीषण दुर्घटना घडल्या आहेत. यामध्ये अनेकांची जीव गेले आहेत, तर अनेक जण होरपळले आहेत. आज पुन्हा एकदा विनती ऑरगॅनिक कंपनीत ही भीषण दुर्घटना घडल्यामुळे येथील कंपन्यामधील अधिकारी, कर्मचाऱ्यांची, कामगारांची सुरक्षा हा विषय पुन्हा एकदा ऐरणीवर आला आहे.

समीर कृष्णा खेडेकर हा घाणेकुंट गावातील होता. त्याच्या पश्चात पत्नी,आई-वडील दोन विवाहित बहिणी असा परिवार आहे.समीर यांच्या मृत्यूमुळे परिसरातून हळहळ व्यक्त केली जात आहे. या संदर्भात खेड पोलीस ठाण्यात गुन्हा दाखल करण्याची कार्यवाही सुरू आहे विनीत ऑरगॅनिक कंपनीच्या संबंधित व्यवस्थापनाविरोधात हा गुन्हा दाखल करण्यात येत आहे रात्री उशिरापर्यंत हा गुन्हा दाखल होण्याची शक्यता आहे. आता नेमका कोणाच्या विरोधात हा गुन्हा दाखल होतो हे पाहणं महत्त्वाचं ठरणार आहे.