या प्रकरणी पुणे पोलिसांनी उपमुख्यमंत्री अजित पवार यांच्या राष्ट्रवादीच्या आमदाराच्या सख्ख्या भावाला अटक केली आहे. त्यामुळे आता आधीच मंत्री आणि पदाधिकाऱ्यांच्या कारणाम्यामुळे अडचणीत असलेल्या अजित पवारांच्या अडचणीत आणखीनच वाढ झाली आहे. बाळासाहेब मांडेकर असं अटक झालेल्या आमदाराच्या भावाचं नाव आहे. ते भोर वेल्हा मुळशी विधानसभेचे आमदार शंकर हिरामण मांडेकर यांचे सख्खे भाऊ आहेत.

पुणे जिल्ह्यातील चौफुला येथील कला केंद्रात 21 तारखेला रात्री अकराच्या सुमारास गोळीबार झाल्याची घटना समाज माध्यमांद्वारे वाऱ्याच्या वेगाने पसरली होती. यामध्ये सत्ताधारी आमदाराचा एक भाऊ असल्याची सुद्धा चर्चा दोन दिवसांपासून सुरू होती. मात्र याप्रकरणी तक्रारदार कुणीही पुढे येत नव्हते तर कला केंद्राचा मालक सुद्धा अशा पद्धतीने गोळीबार झालाच नसल्याचं सांगत होते. दबाव वाढल्याने पुणे ग्रामीण पोलिसांनी कला केंद्राचा मॅनेजरला ताब्यात घेतले. अखेर चौकशीअंती गोळीबार झाल्याच्या घटनेला पोलिसांनी दुजोरा दिला. या चौकशीमध्ये आम्ही अत्यंत घाबरलो असल्याने तक्रार देण्यासाठी पुढे आलो नाही असं मॅनेजरने सांगितलं होतं. पण अखेर मॅनेजरच्या तक्रारीनंतर यवत पोलिसांनी चार जणांवर गुन्हा दाखल केला. यामध्ये शंकर मांडेकर यांचे बंधू बाळासाहेब मांडेकर यांच सुद्धा नाव होतं. बाळासाहेब मांडेकर, गणपत जगताप, चंद्रकांत मारणे यासह आणखी एका अनोळखी व्यक्तीवर दौंडच्या यवत पोलीस ठाण्यात गुन्हा दाखल करण्यात आला आहे. या तिघांनाही पोलिसांनी ताब्यात घेतलं आहे.

Pune News: FRP चे तुकडे कराल, तर गाठ शेतकऱ्यांशीच! राजू शेट्टींचा केंद्राला थेट इशारा

गोळीबार आणि एक नर्तकी बेशुद्ध

याप्रकरणी पोलिसांनी दिलेल्या माहितीनुसार, न्यू अंबिका कला केंद्रात बाळासाहेब मांडेकर याने नाचताना अचानक बंदूक काढून हवेत गोळीबार केला. गोळी भिंती व छतावर आदळली. त्यानंतर आरोपी बाळासाहेब मांडेकर, गणपत जगताप, चंद्रकांत मारणे व त्यांच्यासोबत असलेला एक अनोळखी इसम हे चौघे घाबरून गाडीतून निघून गेले. गोळीबाराने घाबरलेली एक नर्तकी बेशुद्ध पडलेली होती. तिला उपचारासाठी रुग्णालयात दाखल करण्यात आले.

कोण आहेत शंकर मांडेकर?

आपल्या भावाच्या कारणाम्यामुळे अडचणीत आलेले शंकर मांडेकर हे पुणे जिल्ह्यात जायंट किलर म्हणून प्रसिद्ध आहेत. शकंर मांडेकर हे आधी राष्ट्रवादी काँग्रेसकडून मुळशी जिल्हा परिषद सदस्य म्हणून निवडून आले. त्यानंतर पाच वर्षानंतर त्यांनी शिवसेनेत प्रवेश केला आणि शिवसेनेकडून जिल्हा परिषद सदस्य बनले. शिवसेनेत फुट पडल्यानंतर ते उद्धव ठाकरेंच्या पक्षासोबतच राहिले. मात्र 2024 च्या विधानसभा निवडणुकीचा अर्ज दाखल करण्याच्या काही तास आधी त्यांनी उमेदवारी मिळवत अजित पवारांच्या राष्ट्रवादी कॉंग्रेसमध्ये प्रवेश केला. शंकर मांडेकर लढवत असणारी विधानसभेची ही पहिलीच निवडणूक होती. या निवडणुकीमध्ये त्यांनी पुणे जिल्ह्यातील मोठे प्रस्थ असणाऱ्या संग्राम थोपटे यांचा पराभव केला. त्यामुळे एका बड्या नेत्याचा पराभव केल्याने शंकर मांडेकर यांना जिल्ह्यात जायंट किलर म्हणून ओळखलं जाऊ लागलं. आता आपल्या सख्ख्या भावाच्या प्रतापामुळे मांडेकर यांच्या अडचणी वाढल्या आहेत. आधीच कृषिमंत्री माणिकराव कोकाटे, पदाधिकारी असणारे सूरज चव्हाण यांच्या कारणामुळे अडचणीत असणाऱ्या अजित पवारांसमोर आणखी एक मोठी अडचण या निमित्ताने उभी राहिली आहे.