“जरांगेची भेट घेण्यापूर्वी त्यांची मागणी काय याची माहिती तुम्हाला असतानाही तुम्ही भेटलात. तुमच्या बापाने 2004-05 दरम्यान एक परिपत्रक काढून कुणबी मराठा आणि मराठा कुणबी एकच समजावेत असा आदेश काढला होता. त्यामुळे ओबीसी उद्ध्वस्त झाला. आता तुम्ही बापाच्या पावलावर पाऊल ठेवत जरांगेला भेटायला गेलात”, अशी टीका लक्ष्मण हाके यांनी केली. “प्रणिती शिंदे राजकारण करत आहेत. खासदारकी भोगत आहेत. पण ते सोलापूर जिल्ह्यातील बहुसंख्या भटक्या विमुक्त जातीच्या जीवावर, त्यांच्या बापाने काढलेल्या एका जआर मुळे ओबीसी समाजाच्या आरक्षणाची घटनात्मक चौकट उद्ध्वस्त झाली होती”, अशीदेखील टीका लक्ष्मण हाके यांनी केली.

“तुमच्या बापाने ओबीसी आरक्षणाच्या नरडीचा घोट घेतला आणि तुम्ही त्याच बापाच्या पावलावर पाऊल ठेवत जातीयवादी मनोज जरांगे याला भेटायला गेलात. जरांगेच्या मागणीनुसार जर त्याच्या जातीला ओबीसीमधून आरक्षण दिले तर मूळ मागास असलेला गोरगरीब, ओबीसी समाज त्याच्या समाजाच्या स्पर्धेत टिकेल का? याची जाणीव तुम्हाला असायला हवी होती. पण, याचा विचार ना तुमच्या बापाने केला, ना तुम्ही करताय. जरांगेला भेटण्यापूर्वी जिल्ह्यातील गोरगरीब ओबीसी समाजाचा विचार तुम्ही करायला हवा होता. मात्र, ओबीसी मरो आणि तुमचे राजकारण जगो ही तुमची वृत्ती असेल तर येत्या लोकसभा निवडणुकीत तुमचा करेक्ट कार्यक्रम करणार”, असा घणाघात लक्ष्मण हाके यांनी केला.