Nagpur News : नागपुरमध्ये गणेशोत्सवासाठी तयार करण्यात आलेल्या कृत्रिम विसर्जन टाकीत बुडून सात वर्षीय मुलाचा मृत्यू झाल्याची दुर्दैवी घटना घडली आहे. या घटनेमुळे परिसरात शोककळा पसरली आहे.
वृत्तानुसार, नागपूर महानगरपालिकेने गणेशोत्सवाच्या काळात मूर्तींचे विसर्जन पर्यावरणपूरक पद्धतीने व्हावे, यासाठी शहरातील विविध भागांत कृत्रिम विसर्जन टाक्यांचे निर्माण केले आहे. त्याचाच एक भाग म्हणून लकडगंज परिसरातील कच्ची वीसा मैदानावरही मोठ्या आकाराची कृत्रिम टाकी तयार करण्यात आली आहे. गेल्या तीन दिवसांपासून नागपूरमध्ये संततधार पावसाने हजेरी लावल्याने या टाक्यांत पाणी साठले होते
Beed News : आजोबांनी पिशवीतून आणलं, आजीने कपड्यातून बाळाला बाहेर काढलं अन् अंत्यसंस्कारावेळी चमत्कार घडला, डॉक्टरांचं म्हणणं काय?
गुरुवारी पाऊस थांबल्यानंतर मृत महेश आपल्या दोन मित्रांसह लकडगंज पोलिस ठाण्याच्या समोर असलेल्या कच्ची वीसा मैदानावर खेळायला गेला होता. खेळताना महेशला कृत्रिम विसर्जन टाक्याच्या पाण्यात एक बॉल दिसला. बॉल बाहेर काढण्यासाठी महेश टाकीत उतरला. मात्र, टाकीत नेमके किती पाणी आहे, याचा अंदाज न आल्याने तो खोल पाण्यात गेला आणि बुडायला लागला.
महेश पाण्यात बुडत असल्याचे लक्षात येताच त्याच्या मित्रांनी आरडाओरड केली. घटनेची माहिती काही मिनिटांतच पोलीस आणि अग्निशमन विभागाला देण्यात आली. लगेच बचाव पथक घटनास्थळी दाखल झाले आणि शोधमोहीम सुरू केली. काही वेळातच महेशचा मृतदेह पाण्यातून बाहेर काढण्यात आला.
महेशच्या मृत्यूने परिसरातील नागरिक हळहळले आहेत. मृत महेशचे वडील कोमल थापा सुरक्षा रक्षक म्हणून काम करतात. महेश आपल्या तीन भावंडांमध्ये सगळ्यात मोठा होता. त्याच्या जाण्याने कुटुंबावर दुःखाचा डोंगर कोसळला आहे. दरम्यान, या घटनेनंतर नागपूर महानगरपालिकेच्या कृत्रिम विसर्जन टाक्यांच्या सुरक्षिततेवर प्रश्नचिन्ह उपस्थित झाले आहेत. अशा टाक्यांभोवती संरक्षण कठडे, सूचना फलक आणि सतत देखरेख असावी, अशी मागणी स्थानिक नागरिकांनी केली आहे. पोलिसांनी घटनेचा पंचनामा करून पुढील तपास सुरू केला आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा